Emigrantët dhe turistët shkaktojnë fluks të lartë gjatë fundjavës në portin e Vlorës

Gjatë ditëve të fundit, në portin e Vlorës kanë hyrë 658 pasagjerë, kryesisht emigrantë që kthehen për pushime nga Italia dhe vende të tjera të botës.

Sezoni veror ka hyrë në pikun e tij, dhe porti i Vlorës është kthyer në një nga pikat kryesore hyrëse, ku çdo ditë mbërrijnë qindra pasagjerë nga Italia përmes linjës tragete Vlorë–Brindisi.

Sipas të dhënave zyrtare, gjatë fundjavës në portin e Vlorës kanë hyrë 658 pasagjerë, shumica emigrantë dhe turistë të huaj, me italianët që zënë pjesën më të madhe të tyre.

Vetëm në dy ditët e fundjavës, numri i pasagjerëve në hyrje ka shkuar mbi 1,100, ndërsa nëse përfshihet edhe dita e premte, kjo shifër arrin mbi 1,500 persona.

Gjatë këtyre ditëve në port janë regjistruar gjithashtu 145 autovetura, 5 autobusë me pasagjerë dhe 4 kampera turistike.

Fluksi ka nisur që në fillim të korrikut dhe pritet të arrijë kulmin në mesin e gushtit, kur emigrantët dhe turistët do të fillojnë rikthimin drejt vendeve ku jetojnë dhe punojnë.