EMRI/ I kërkuar në Itali për dhunë seksuale dhe rrëmbim, kapet në Cërrik 52-vjeçari

Një 52-vjeçar i shpallur në kërkim ndërkombëtar nga autoritetet italiane është arrestuar në qytetin e Cërrikut.

Ndaj 52-vjeçarit Albano Kume, drejtësia italiane kishte lëshuar urdhër-arresti për vepra të rënda penale si: “Dhuna seksuale”, “Rrëmbimi i personit”, “Vjedhja” dhe “Shkelja e rregullave për armët”.

Arrestimi i 52-vjeçarit Kume u bë nga strukturat e Drejtorisë së Forcës së Posaçme Operacionale gjatë operacionit të koduar “Operacionalja 56”, ndërsa Interpol Tirana ka nisur procedurat për ekstradimin e tij drejt Italisë, në bashkëpunim me autoritetet e vendit fqinj.

Njoftimi i plotë i policisë

“Strukturat e Drejtorisë së Forcës së Posaçme Operacionale, në vijim të operacioneve të njëpasnjëshme për kapjen e shtetasve të shpallur në kërkim ndërkombëtar, finalizuan operacionin e radhës, të koduar “Operacionalja 56”.

Në kuadër të këtij operacioni, në Cërrik, u bë i mundur lokalizimi, kapja dhe arrestimi i shtetasit A. K., 52 vjeç, banues në Cërrik.

Ky shtetas ishte shpallur në kërkim ndërkombëtar pasi autoritetet italiane kanë lëshuar urdhër arresti ndaj tij, për veprat penale “Dhuna seksuale”, “Rrëmbim personi”, “Vjedhja” dhe “Shkelja e rregullave për armët”. Për këto vepra penale, Kodi Penal i Italisë parashikon dënim maksimal deri në 15 vjet burgim.

Interpol Tirana vijon procedurat në bashkëpunim me autoritetet italiane, për ekstradimin e këtij shtetasi”, thuhet në njoftim.

LEXONI GJITHASHTU:

• Aksident tragjik në Palasë–Dhërmi/ Humb jetën pasagjeri 9-vjeçar, arrestohet shoferi
• Tre mjete përfshihen në një aksident të fortë në Berat, 3 të lënduar në spital