EMRI/ Zbulohet arsenal i madh armësh e pajisjesh, arrestohet 34-vjeçari, 2 në kërkim

Sektori i Krimeve të Rënda, ka finalizuar me sukses operacionin policor “The Van”, duke zbuluar një bazë të fshehur me armë dhe pajisje të dyshuara për trafik.

Gjatë operacionit të zhvilluar në Tiranë, u arrestua Eugert Sino 34 vjeç, i cili dyshohet se ka mbajtur dhe poseduar arsenalin e armëve të sekuestruara. Gjithashtu, janë shpallur në kërkim dy shtetas të tjerë të përfshirë në këtë veprimtari kriminale.

Gjatë kontrollit të furgonit të shtetasit Eugert Sino në rrugën “Myslym Shyri”, u gjetën dhe u sekuestruan një sasi e madhe armësh dhe pajisjesh, përfshirë:

• 12 armë zjarri pistoletë të markave të ndryshme si “Beretta”, “Glock”, “Ruger-57” dhe “Tanfoglio”;

• 6 armë zjarri automatike;

• 5 armë me tytë të gjatë, të ngjashme me snajper, të pajisura me shënjestër optike;

• 1 silenciator;

• 17 krehra për armë zjarri të ndryshme;

• 15,000 fishekë;

• Pajisje për shpërthime në distancë dhe pajisje elektronike për gjurmimin GPS;

• Pajisje për bllokimin e valëve dhe numërimin e kartëmonedhave;

• 3 komplete uniformash të ngjashme me ato të Policisë, si dhe shumë sende të tjera të kundërligjshme.

Përveç armëve, u gjetën edhe 17 kuti me pranga të ngjashme me ato që përdoren nga Policia. Ndërkohë policia po vijon hetimet për identifikimin dhe kapjen e dy shtetasve të shpallur në kërkim.

Materialet procedurale iu referuan Prokurorisë, për veprime të mëtejshme, për veprat penale “Trafikimi i armëve dhe i municionit” dhe “Mbajtja pa leje dhe prodhimi i armëve, armëve shpërthyese dhe i municionit”.