Ermonela Felaj: Ja hapat që ndiqen për heqjen e imunitetit të Berishës

Nënkryetarja e Kuvendit Ermonela Felaj, për Euronews Albania ka shpjeguar hapat që do të ndiqen nga Kuvendi për heqjen e imunitetit të Sali Berishës.

Ajo theksoi se kërkesa e SPAK do të vendoset e para në rendin e ditës në momentin që do të vendoset dita që do të mbahet seanca.

Sipas Felajt pasi përfundimit të mbledhjes së Këshillit të Mandateve që do të mblidhet të hënën e javës tjetër, bëhet një raport i cili paraqitet  në Kuvend por që nuk ka vend për diskutim.

“Ka një  kohë në dispozicion. Fillon nga një ditë deri në dy javë, për t’i paraqitur raportin Kuvendit të Shqipërisë. Ky raport më parë i bëhet me dije të gjithë anëtarëve të Kuvendit të Shqipërisë. Përsa i përket seancës ku do të shqyrtohet kjo kërkesë, ajo vendoset si pikë e parë e rendit të ditës së asaj seance plenare dhe deputeti ka të drejtë të shprehet dhe para gjithë Kuvendit për qëndrimin e tij ndaj kërkesës së SPAK.

Ndërkohë raporti i Këshillit të Rregullores i Mandateve dhe imuniteteve nuk bëhet objekt diskutimi. Raporti i Këshillit është orientues për ata, ndërsa deputetët vendosin për dhënien ose jo të autorizimit për votim të hapur. Më para fjala i jepet Prokurorisë së Posaçme dhe më pas operohet me pyetje, ose nga i interesuari ose nga anëtarët e Këshillit të Mandateve, Rregullores dhe Imuniteteve. Deputetët e humbasin mandatin vetëm nëse nuk vijnë për 6 muaj rrjesht në Kuvend”-tha ajo.

LEXONI GJITHASHTU: 

• Ambasadori Hill: Serbët ta kuptojnë se fati i tyre është në duart e tyre, jo në SHBA
• Shtohet frika për luftë, baza e re detare ruse në Detin e Zi alarmon Gjeorgjinë