Europa League: Milan e nis me fitore, Roma ndalet nga Feyenoord

Forma e mirë në kampionatin Italian është pasqyruar dhe në Europa League nga skuadra e Milanit, e cila e ka nisur me fitore rrugëtimin në këtë kompeticion. Skuadra e udhëhequr nga Stefano Pioli dominoi përballë francezëve të Rennes në 1/16, duke shënuar dhe 3 gola. HEroi i takimit ishte mesfushori Loftus Cheek me 2 gola të shënuar. Triumfi u vulos pas nga Rafael Leao i cili realizoi një gol të bukur, i shërbyer nga Theo Hernandez. Pas këtij rezultati 3-0, Milani e sheh veten të avantazhuar për ndeshjen e kthimit.

Roma e Mourinho nuk ka shkuar më tepër se një barazim në Holandë ndaj Feyenoord. Kryeqytetasit e Italisë arritën të shmangin humbjen, pasi vendësit deri në minutën e 67’ ishin në avantazh falë golit të Paixao, por Lukaku riktheu ekuilibrat, duke bërë më të lehta llogaritë për ndeshjen e kthimit. Surpriza e së enjtes ishte padyshim Qarabag e cila fitoi në Portugali ndaj Bragës 1-4, duke vijuar qëndrimin në këtë kompeticion, ndërsa sfida e vetme pa gola ishte ajo mes Lens dhe Freiburg.

Galatasaray mori një fitore në minutat e fundit, ndërsa bomber Icardi ishte shpëtimtari i skuadrës, duke shënuar për 3-2. Një përballje që pa 2 kartona të kuq, nga 1 për secilën skuadër. Dy ekipet e tjera portugeze që garuan të enjten, Benfica e Lisbona morën fitore respektivisht ndaj Toulouse dhe Young Boys. Sa i përket përballjes mes Shakhtar dhe Marsejës, u mbyll në barazim 2-2. Aubameyang dhe Ndiaye realizuan për francezët, ndërsa ekipi ukrainas u përgjigj me Matvienko e Eguinaldo. Ndeshjet e kthimit luhen të enjten e javës së ardhshme.

LEXONI GJITHASHTU:

• Trafikoi mbi 1.3 ton kokainë, sulmuesi i njohur dënohet me 6 vite burg
• Rezultatet e Champions: Manchester City bën detyrën, Reali fitore mes polemikash