Europol godet rrjetin kriminal në Kosovë, sekuestrohen 80 milionë euro

Mesazhet e shkëmbyera në platformën e komunikimit të koduar SKY ECC kanë zbuluar një rrjet të krimit të organizuar me bazë në Kosovë, i dyshuar për trafik droge në shkallë të gjerë, përdorim dokumentesh të falsifikuara, armëmbajtje pa leje dhe pastrim parash në disa vende të Evropës.

Sipas hetimit trevjeçar të zhvilluar me mbështetjen e Europolit, operacioni kulmoi më 9 qershor me një ditë të koordinuar veprimi në Kosovë, ku autoritetet arrestuan pesë anëtarë të dyshuar si pjesë e grupit kriminal. Në terren u angazhuan rreth 150 oficerë, të mbështetur edhe nga ekspertë të Europolit.

Sipas të dhënave të publikuara nga Europoli, që prej nisjes së hetimit janë hetuar 42 persona, janë kontrolluar 76 ambiente dhe janë sekuestruar asete kriminale me vlerë rreth 80 milionë euro.

Hetuesit thonë se grupi përdorte platforma të koduara komunikimi për të koordinuar aktivitetet e trafikimit të drogës në disa vende evropiane, ndërsa qendra e tij operative ndodhej në Kosovë. Nga aty dyshohet se drejtuesit organizonin dërgesa ndërkombëtare droge dhe pastrimin e fitimeve kriminale.

Operacioni është pjesë e një hetimi të gjatë ndërkombëtar, ku janë analizuar sasi të mëdha të inteligjencës, përfshirë komunikime të koduara mes të dyshuarve. Duke kombinuar të dhënat operative me informacionin ndërkufitar, hetuesit kanë identifikuar anëtarët kryesorë të rrjetit dhe kanë gjurmuar flukset financiare të aktivitetit kriminal.

Operacioni u zhvillua në kuadër të një strukture të përbashkët hetimore me pjesëmarrjen e Belgjikës, Francës, Kosovës dhe Holandës, me mbështetjen e Europolit. Gjatë ditës së aksionit, një ekspert i Europolit u dërgua në terren për të koordinuar shkëmbimin e informacionit në kohë reale.

Autoritetet theksojnë se bashkëpunimi ndërkombëtar mbetet kyç për goditjen e rrjeteve të krimit të organizuar që veprojnë në disa juridiksione njëkohësisht.