Eva Buzo përshkon ujërat e Jonit në një sfidë të re sportive rreth Ishullit të Sazanit

Eva Buzo, avokatja dhe rekordmenia shqiptaro-australiane në not, është rikthyer sërish në Vlorë për të ndërmarrë një tjetër sfidë të rëndësishme në ujëra të hapura.

Ajo u nis nga zona e Radhimës në drejtim të Ishullit të Sazanit, ku po zhvillon një notim sfidues përreth ishullit më të madh të Shqipërisë.

Fillimisht e shoqëruar nga anëtarë të stafit mbështetës dhe më pas e vetme, Buzo vijoi rrugëtimin e saj sportiv në ujërat e Jonit, duke përballuar një itinerar që kërkon përgatitje të lartë fizike dhe qëndrueshmëri.

Sfida përfshin përshkimin e vijës bregdetare të Ishullit të Sazanit, e cila shtrihet në rreth 15 kilometra, duke vënë në provë aftësitë dhe rezistencën e saj në kushte të hapura detare.

Kjo nuk është hera e parë që sportistja zgjedh Vlorën për sfidat e saj. Dy vite më parë, Eva Buzo tërhoqi vëmendjen e publikut me një arritje të veçantë, kur realizoi notimin nga brigjet e Italisë drejt Gadishullit të Karaburunit, një sfidë që u vlerësua gjerësisht në Shqipëri dhe më gjerë.

Edhe këtë herë, sfida e saj pritet të ndiqet me interes nga sportdashësit dhe qytetarët, duke konfirmuar edhe një herë pasionin dhe përkushtimin e saj ndaj notit në ujëra të hapura.

U nis me not nga Sazani dhe mbërriti në Porto Novo, notarja Eva Buzo thyen tjetër rekord pic.twitter.com/zBRQFbyq2b

— Euronews Albania (@EuronewsAlbania) June 6, 2026