Festat e emigrantëve në Greqi, Edmond Guri: Po festohen ndryshe, jemi organizuar vetëm me familjet

Përfaqësuesi i Komunitetit shqiptar në Greqi, Edmond Guri në një komunikim për Euronews Albania deklaroi se shqiptarët në vendin fqinj po i kalojnë festat e fundviti ndryshe nga vitet e tjera për shkak të kufizimeve nga pandemia COVID-19.

“Ndryshe nga vitet e kaluara, por gjithsesi ne shqiptarët kemi ditur të përballojmë sfida edhe më të vështira edhe më të ashpra, edhe këtë rast kemi mundur të organizohemi për festime familjare, ashtu siç e parashikojnë dhe masat anti-pandemi,” – tha Guri duke pranuar se për shkak të pandemisë shumë emigrantë nuk kanë mundur të kthehen në Shqipëri.

Guri tha se për shkak të rrethanave të jashtëzakonshme tashmë tradita e festimit të festave të fundvitit është thyer. Vetëm për festat e fundvitit në pikat kufitare gjatë viteve të shkuara kalonin 17 mijë deri në 24 mijë persona në ditë, shifra që sipas Gurit janë të pakrahasueshme me ato aktualet.