Fluks në fillim të gushtit në Kakavijë, mbi 10 mijë persona kaluan kufirin në 24 orë

Në ditët e para të muajit gusht, fluksi i lëvizjes në Doganën e Kakavijës mbetet i lartë, me një numër të konsiderueshëm personash dhe mjetesh që kalojnë në të dyja anët e kufirit me Greqinë.

Sipas Policisë Kufitare të Gjirokastrës, gjatë 24 orëve të fundit, në Kakavijë kanë hyrë dhe dalë nga territori shqiptar gjithsej 10.162 persona, ku 6.394 prej tyre kanë hyrë në Shqipëri dhe 3.768 kanë dalë, ndërsa janë regjistruar gjithsej 3.156 mjete, nga të cilat 1.955 kanë hyrë dhe 1.201 kanë dalë.

Pjesa më e madhe e këtyre udhëtarëve janë emigrantët që kthehen në Shqipëri për të kaluar pushimet verore me familjet e tyre, si dhe turistë nga Greqia dhe vendet e tjera.

Policia Kufitare është angazhuar për të përshpejtuar ritmet e kalimit të kufirit dhe për të evituar krijimin e radhëve të gjata.

Po ashtu, pala greke ka shtuar numrin e sporteleve për kontrollin e dokumenteve, duke lehtësuar kështu kalimin e kufirit.

Fluksi i lartë i lëvizjes në këtë doganë pritet të vazhdojë gjatë gjithë muajit gusht.

LEXONI GJITHASHTU:

• Gushti sjell fluks të lartë në Qafë Thanë, radhë kilometrike në dalje nga Shqipëria
• Radhë të gjata në Kakavijë, fundjava e parë e gushtit sjell fluks të lartë në kufi