FMN: Rritja ekonomike 3.5%, turizmi garantoi zhvillimin

Në përfundim të misionit dy javor të Fondit Monetar Ndërkombëtar, kreu i misionit deklaroi se ekonomia shqiptare po përparon, por duhen më shumë përpjekje për të ruajtur rritjen e qëndrueshme dhe për të luftuar inflacionin.

 “Në presim që rritja ekonomike këtë vit të jetë 3.5%, por duhet një menaxhim më i mirë i investimeve publike, duke kërkuar orientim të fondeve në projekte me produktive. Duhet punuar më tej për të ulur rrezikun fiskal të kontratave koncensionare dhe ndërmarrjeve shtetërore,” – u shpreh Anke Weber, shefe e misionit të FMN-së për Shqipërinë.

Një strategji efektive e të ardhurave afatmesme gjithashtu ishte në fokus të rekomandimeve nga Weber, e cila deklaroi se duhet një konsolidim i besueshëm fiskal në agjendën e reformës tatimore.

FMN gjithashtu mbështet ligjin e miratuar mbi tatimin e të ardhurave.

Por ecuria e inflacionit ende nuk është e sigurt. Banka e Shqipërisë duhet të nxisë përpjekjet për rritjen e përdorimit të monedhës vendase në transaksione, tha shefja e misionit të FMN-së.

Gjatë gjysmës së parë të vitit, performanca ekonomike shënoi rritje me 3%, ku nga tre-mujori i parë tek i dyti, konsumi dhe investimet u rritën përkatësisht 4.2% dhe 9.2%.

Sektorët predominues të performancës ekonomike kanë qenë turizmi dhe ndërtimi, mbështetur nga rritja e kërkesës së brendshme.

Normat e punësimit gjithashtu vijojnë të përforcohen, duke u rritur me 2,7% krahasuar me një vit më parë, ndërkohë që shkalla e papunësisë ka zbritur në 10.7%, një nga shifrat më të ulëta historike.

Gjithashtu Shqipëria këtë vit për herë të parë del nga lista gri e shteteve me nivel të lartë të pastrimit të parasë nga FATF, Task Forca për Veprimin Financiar.

LEXONI GJITHASHTU:

• Ministri Mete zhvillon takim me Misionin e FMN-së
• Eksportuesit letër FMN-së: Rënia e euros po ndikohet nga paratë kriminale