Francë| Macron pret krerët e së majtës, bisedime edhe me Le Pen

Gjashtë javë nga raundi i dytë i zgjedhjeve legjislative, presidenti Emanuel Makron, që kishte kërkuar një “armëpushim Olimpik”, ka pritur kryetarët e partive të ndryshme për të diskutuar caktimin e qeverisë së re dhe kryeministrit.

Koalicioni i majtë Fronti i Ri Popullor, që fitoi shumicën e mandateve në zgjedhjet parlamentare por jo shumicën prej 289 vendesh që përbëjnë shumicën absolute, nisën këtë të premte konsultimet në pallatin Elize.

Përfaqësuesit e së majtës mbërritën në 10 e 30 me orën lokale, bashkë me kandidate e propozuar për kryeministre, Lusi Kastets, me profesion ekonomiste.

Kastets deklaroi përpara një grupi gazetarësh se Fronti i Ri Popullor është i vetëdijshëm se do t’i duhet të bëjë kompromise në mungesë të mazhorancës absolute.

Përpara Lojërave Olimpike të Parisit, Makron kishte refuzuar figurën e saj, duke zemëruar koalicionin e krahut të majtë që synon të udhëheqë vendin.

Pas bisedimeve me liderët e së majtës, Makron do të presë edhe ata të bllokut të qendrës, si dhe konservatorët e partisë së djathtë, “E drejta republikane”.

Ekstremistët e Bashkimit Kombëtar, Marine Le Pen dhe Xhordan Bardela do të ftohen gjithashtu në pallatin presidencial mëngjesin e së hënës.

Pas këtyre bisedimeve, Makron do të zhvillojë bisedime edhe me kryetarin e Asamblesë Kombëtare dhe atë të Senatit.

Rrjedhimisht i bie që kryeministri të mos jetë caktuar përpara të martës së ardhshme, ka saktësuar zyra e shtypit e Elizeut, pa dhënë detaje të tjera.

LEXONI GJITHASHTU:

• Macroni i bën thirrje Iranit ta shmangë përshkallëzimin në Lindjen e Mesme
• Macron s’do ta emërojë Qeverinë e re deri pas Olimpiadës: Do krijonte parregullsi