Prokuroria e Posaçme Kundër Korrupsionit dhe Krimit të Organizuar ka dërguar për gjykim në Gjykatën e Posaçme të Shkallës së Parë për Korrupsionin dhe Krimin e Organizuar deputetin e Kuvendit të Shqipërisë, Asllan Dogjani. Dogjani akuzohet për kryerjen e veprës penale “deklarim i rremë i pasurisë”.

Akuzat ndaj tij lidhen me një apartament banimi që Dogjani kishte deklaruar se kishte përfituar më 24 mars 2010, nga shoqëria e ndërtimit “Protial”. Sipas deklaratës së tij në ILDKPI asokohe, ai e kishte marrë këtë pasuri si shpërblim për konsulencat juridike që kishte ofruar dhe do të ofronte për kompaninë në të ardhmen.

Megjithatë, hetimet treguan se kontrata që Dogjani ka paraqitur për këtë transaksion është e rremë. Sipas SPAK, deputeti ka paguar një shumën prej 121.980 eurosh për të blerë apartamentin, duke e likuiduar me pagesa cash.

“Kontrata në ILDKPI është hartuar në mënyrë fiktive, me qëllimin për të fshehur burimin e krijimit të pasurisë”, thuhet në njoftimin e SPAK.

SPAK ka zbuluar se kontrata e paraqitur nga Dogjani ka dy data të ndryshme, 6 shtator 2006 dhe 6 dhjetor 2006, dhe kjo ka ngjallur dyshime për ligjshmërinë e procesit të përfitimit të pasurisë.

“Nga provat shkresore dhe ato të paraqitura nga dëshmitarë, rezulton se kontrata e datës 6 dhjetor 2006 mban të njëjtin numër rep. dhe kol. si ajo e datës 6 shtator 2006, por me ndryshimin e mënyrës së përfitimit të këtij apartamenti. Kjo tregon se kontrata është hartuar në mënyrë fiktive me qëllim deklarimin e rremë të burimit të krijimit të pasurisë së paluajtshme”, thekson SPAK.

LEXONI GJITHASHTU:

• Asllan Dogjani flet pas daljes nga SPAK: Më ka kallëzuar kushëriri i një deputeti
• Deputeti i Partisë Demokratike Asllan Dogjani, paraqitet në SPAK