Një ekspozitë me 85 artistë të shek. XX është hapur në Universitetin e Arteve nga Galeria Kombëtare.
Emra të njohur, artistë të dënuar që shenjuan historinë e artit dhe lëvrues që kanë arritur të bëjnë vend në ekspozitën e titulluar ”Reflektim mbi pasqyrimin vibrues të artit shqiptar në shekullin XX”.
“Jemi munduar të zgjedhim punë që nuk janë ekspozuar, apo janë ekspozuar pak dhe punë që kishin kohë pa u restauruar”, tha drejtuesi i projektit, Olsi Laska.
Ekspozitës që synon të pasqyrojë psikologjinë shqiptare në artet pamore nuk i mungon një vepër e hershme e kryeministrit (Pikëllimi i netëve kosovare, 1989), ndonëse ka artistë të njohur, si Lin Delija, që nuk është pjesë e ekspozitës.
Kuratorja Suzana Varvarica në fjalën e saj pati një sqarim për këtë.
“Do keni përshtypjet tuaja pse nuk janë disa emra. Nëse do të kishit ndjekur ekspozitat që kemi bërë në jug, do të shihnit që janë ekspozuar 150 artistë të njohur. Shumë pikëpytje duhet të bien poshtë, në këtë ekspozitë, janë artistët e Tiranës, Durrësit, Shijakut dhe Krujës”, tha ajo.
Emra, kohë, rryma, qasje, forma, tema e stile bashkohen në një ekspozitë, që mes synimeve ka pasur shmangien e propagandës.
Kjo ekspozitë do të qëndrojë e hapur deri me 15 gusht.
LEXONI GJITHASHTU:
- Galeria ekspozon fondin, hapësire për të njohur formimin e artit pamor shqiptar
- Dy vite në kantier/ Ç’po ndodh me galerinë e arteve?
