Gati projektligji për lindjet “in vitro”, drafti hidhet për konsultim

Projekt-ligji “Për shëndetin seksual dhe riprodhues”  i cili përcakton rregullat e reja për bebet që vijnë në jetë me anë të fekondimit invitro, apo nga nëna surrogate si dhe kohën dhe kushtet e abortit, është hedhur për konsultim publik.

Draft ligji i hartuar nga ekspert të fushës  ka parashikuar kriteret për dhuruesit në procesin e invitro, duke sanksionuar që nga një person nuk mund të lindin më shumë se 5 fëmijë.

 “Dhuruesit e qelizave riprodhuese për fekondim heterolog, i dhurojnë qelizat riprodhuese institucionit shëndetësor që do të realizojë procedurën e Riprodhimit Mjekësor të Asistuar dhe që disponon banka për ruajtjen e qelizave riprodhuese, ose embrioneve. Dhuruesi(ja) i/e qelizave riprodhuese është i/e detyruar t’i nënshtrohet ekzaminimeve dhe analizave laboratorike të nevojshme, për të kontrolluar gjendjen shëndetësore të tij/saj. Mosha e donatoreve femra për dhurimin e vezëve përfundon në moshën 35 vjeçare. Për donatorët meshkuj, dhurimi i spermatozoideve përfundon në moshën 45 vjeçare.”

Po ashtu ky dokument ligjor i jep të drejtën çdo vajzë nisur nga mosha 18 vjeç që të mund të sjell në jetë një fëmijë me anë  të teknikave invitro.

 “Aplikimi i teknikave të Riprodhimit Mjekësor të Asistuar për trajtimin e infertilitetit fillon pas moshës 18 vjeçare dhe përfundon në moshën 53-vjeçare. Embrionet dhe vezët e pafekonduara mund të ruhen në ngrirje derisa gruaja të mbush moshën 53 vjeçare. Pas kësaj moshe, vezët ose embrionet nëse nuk dhurohen, duhet të asgjësohen”.

Vitet e fundit kërkesa e çifteve për të sjellë në jetë fëmijë me anë të riprodhimit të asistuar ka ardhur në rritje, kjo në shumë raste e diktuar nga problemet me infertilitetin.  Deri më tani ky proces kryhet vetëm në spitalet private apo jashtë vendit. se shpejti , teknika invitro do të jetë pjesë e shërbimeve të ofruara dhe në sistemin publik dhe i pari prite ta ofrojë materniteti Koço Gliozheni.

LEXONI GJITHASHTU:

• “Gruaja humbi jetën nga In Vitro”-pastori debat me gjinekologen
• Mit apo e vërtetë? Mjeku tregon a lindin zakonisht binjakë me In Vitro