Gazetari Danglli: Medias në Shqipëri i mungon transparenca financiare

Gazetari i Euronews Albania, Andrea Danglli, është shprehur se medias në Shqipëri i mungon transparenca financiare.

Komentet Danglli i bëri në emisionin “Good Morning Albanians”, në Ditën Ndërkombëtare të Medias.

Ai tha gjithashtu se në vendin tonë mediat janë të lira, por janë të varura nga shumë gjëra, si nga financat apo lidhjet e pronarëve me politikanët dhe biznesmenët.

“Në këtë ditë është një raport i publikuar nga Reporterët pa Kufij që e rendisin Shqipërinë të fundit vend në rajon për lirinë e medias, duke humbur dy vende nga viti i kaluar. Kosova është akoma edhe më mirë, për të mos folur pastaj për Maqedoninë e Veriut që është vendi më i mirë i rajonit për lirinë e medias.

Është më mirë se Shqipëria, Kosova dhe Serbia. Kemi humbur dy vende. Mjafton të marrësh në telefon për të pyetur sa të lirë dhe të pavarur janë dhe i konstaton me lehtësi sa të lirë dhe të pavarur janë. Në fakt gazetarët në Shqipëri janë të lirë, por janë të varur.

Janë të varur sepse është problemi i pronarëve, sesa i lidhur është një pronar me institucionet e bizneset. Në Shqipëri ka mungesë të theksuar transparence financiare. Në Shqipëri kemi shumë media dhe unë nuk besoj se ato mbijetojnë nga reklamat. Ky është një tregues shumë i madh për të kuptuar ku është situata e medias.

Unë mendoj se në Shqipëri më e dëmshme sesa censura është autocensura. Shumë gazetarë kanë një autocensurë ndaj vetëvetes së tyre. E dinë se deri ku shkojnë. E dinë se ku janë limitet, e dinë se për një material të caktuar bie telefoni. Ky është një problem shumë i madh. Autocensura është një lloj sëmundje le të themi”, tha Danglli.

LEXONI GJITHASHTU:

• Sulmet ndaj medias, gazetarët protestë para Parlamentit me pankarta në duar
• Raporti për lirinë e medias, Çani: Mund të ishte edhe më keq me pushtetin që ka Rama