Gjyqtari Erjon Bani zgjidhet zëvendëskryetar i GJKKO

Gjyqtari Erjon Bani është zgjedhur zëvendëskryetar i Gjykatës së Posaçme kundër Krimit të Organizuar dhe Korrupsionit.

Gjyqtari Bani do të ushtrojë kompetencat e kryetarit të Gjykatës Speciale deri në zgjedhjen e drejtuesit të këtij institucioni.

Më herët zëvendëskryetare e GJKKO ishte gjyqtarja Irena Gjoka mandati i të cilës përfundoi më datë 24 mars.

Në këto kushte këtë të hënë u mbajt mbledhja e përgjithshme e gjyqtarëve të Gjykatës së Posaçme të Shkallës së Parë për Korrupsionin dhe Krimin e Organizuar për zgjedhjen e zv. Kryetarit të ri.

Në këtë mbledhje ishte i pranishëm edhe Zëvendëskryetari i Këshillit të Lartë Gjyqësor z.Ilir Rusi.

Në garë për të marrë drejtimin e GJKKO ishin gjyqtari Bani dhe kolegu i tij Erjon Çela. Në përfundim të votimit gjytari Bani rezultoi i zgjedhur me 6 vota

“Referuar kërkesave të nenit 26, pika 3 të Ligjit nr. 98/2016 “Për organizimin e pushtetit gjyqësor në R.SH.” si dhe të vendimit Nr. 7, datë 21.12.2018 “Rregullore për miratimin e rregullave për zgjedhjen e zëvendëskryetarëve të gjykatave” të Këshillit të Lartë Gjyqësor, që parashikojnë zgjedhjen e zëvendëskryetarit nga rradhët e gjyqtarëve të Gjykatës, pas procesit të verifikimit të përmbushjes së kritereve ligjore për dy kandidaturat e paraqitura, konkretisht gjyqtarët Erjon Bani dhe Erjon Çela, në prani të nëntë gjyqtarëve, Mbledhja e Përgjithshme vijoi me kryerjen e procedurës së votimit.

Në përfundim, Z. Erjon Bani, rezultoi i zgjedhur me 6 vota, si Zëvendëskryetari i Gjykatës së Posaçme të Shkallës së Parë për Korrupsionin dhe Krimin e Organizuar. Në kushtet kur pozicioni i kryetarit është vakant, Z. Erjon Bani do të ushtrojë kompetencat e Kryetarit të Gjykatës së Posaçme të Shkallës së Parë për Korrupsionin dhe Krimin e Organizuar, deri në zgjedhjen e kryetarit të kësaj gjykate nga Këshilli i Lartë Gjyqësor”, thuhet në njoftimin e GJKKO.