Kryeministri Edi Rama ka reaguar përmes një postimi në rrjetin social “X” në lidhje me hetimin e SPAK për abuzimet me fondet në Universitetin Bujqësor të Kamzës.

Shefi i qeverisë njofton se ditën e nesërme do të mbledhë grupin parlamentar të PS, ku do të jetë i pranishëm edhe rektori i Universitetit Bujqësor, Fatbardh Sallaku. Sipas Ramës, rektori, i cili nuk është i përfshirë në hetimet e Prokurorisë, kërkon të dëgjohet publikisht në lidhje me lëshimin e 24 masave të sigurisë pa gjyq nga ana e Prokurorisë së Posaçme, por dhe për arritjet e universitetit që drejton.

“Nesër në 09:00, Grupi Parlamentar i shumicës qeverisëse do të dëgjojë, me kërkesën e tij, Rektorin e Universitetit Bujqësor, Fatbardh Sallaku, lidhur me 24 masa sigurie PA GJYQ për stafin dhe pedagogët e universitetit për disa procedura të disa viteve më parë. Vetë rektori, i cili nuk rezulton i lidhur me këtë hetim, flet për një keqkuptim shumë të madh dhe kërkon të dëgjohet publikisht, në një moment historik kthese për Universitetin Bujqësor, që ka hyrë në rrugën e transformimit me synim njëhsimin e plotë të diplomave me Universitetin BOKU të Vienës në Shqipërinë 2030,” shkruan Rama në “X”.

Kujtojmë se mbi 20 masa sigurie janë lëshuar me kërkesë të SPAK këtë të martë për abuzime me tenderë në Universitetin Bujqësor.

Në pranga kanë përfunduar 5 persona, ndërkohë që janë lëshuar edhe 10 masa arresti në shtëpi dhe 9 detyrime paraqitjeje.

LEXONI GJITHASHTU:

• SPAK lëshon 20 masa sigurie për abuzime me tenderë në Universitetin Bujqësor
• “Keni dëgjuar ndonjë deklaratë të ambasadës për SPAK”? Rama: SHBA është tërhequr