Hidhet shorti i çerekfinaleve në Champions League, njihuni me finalet e parakohshme

Kompeticioni i më të mirëve të Evropës ka mbërritur në fazën më interesante, e bëhet fjalë për Champions League, që këtë të premte zbuloi 4 çiftet çerekfinaliste. Shorti nuk zhgënjeu askënd, duke prodhuar përballje të forta, por dhe një finale të parakohshme. Reali i Madridit, rekordmeni i këtij kompeticioni do të përballet me Manchester Cityn, fituesin në fuqi të Champions. Sezonin e shkuar këto dy skuadra u përballën me njëra-tjetrën, me britanikën që u kualifikuan me goleadë, ndërsa duket se ka ardhur momenti për hakmarrje.

Në përballjet e tjera, Bayerni sfidohet nga Arsenali, Dortmundi përballet me Atletiko Madrid, ndërsa Barcelona me skuadrën tashmë të preferuar PSG-në. Duele interesante po ashtu, ndërsa ajo që mund të cilësohet e vështirë është gjetja e favoritit, kjo për faktin se ekipet po kalojnë një superformë. Përballja e fundit anglo-gjermane Bayern-Arsenal daton në 2017-ën aty ku bavarezët kalonin më tej me rezultatin total 10-2.

Dortmundi dhe Atletiko janë përballur 4 herë me njëra-tjetrën në vitet e shkuara të këtij kompeticioni, përballje të vlefshme për fazën e grupeve, ku secila ka nga 2 fitore. Kur shohim ciftin PSG-Barcelona të gjithë përfytyrojmë përmbysjen e çmendur të katalanasve në 2017 pas disfatës 4-0 në Paris. Në Barcelonë, vendësit triumfuan në shifrat 6-1 duke kaluar më tej. Shorti parashikon dhe përballjet gjysmëfinale, ku fituesi i çiftit Real-Man City përballet me atë që kalon më tej në duelin Arsenal-Bayern. Ndërkohë fituesi i Barcelona-PSG përballet me skuadrën që avancon në sfidën Dortmund-Atletiko. Ndeshjet e para luhen më 9 dhe 10 prill e ato të kthimit 1 javë më pas.

LEXONI GJITHASHTU:

• Interi jashtë Champions League, penalltitë “tradhtojnë” zikaltrit
• Barcelona fitore me mungesa, Champions League njeh 2 çerekfinalistë të tjerë