INSTAT publikon të dhënat: Tirana me njerëzit më dembelë

Tirana ka nivelin më të lartë të dembelizmit në raport me qytetet e tjera.

42% e kryeqytetasve, nuk janë në marrëdhënie pune, por as nuk po kërkojnë për t’u punësuar.

Raporti i publikuar nga Instituti i Statistikave, i cili ka marrë në analizë 3 muajt e fundit të 2022-shit, tregon se kryeqyteti renditet për herë të parë në krye të listët për popullsinë jo aktive, duke lënë pas Lezhën, qytet që për shumë vite ishte i pari.

Më pas vjen Dibra dhe Vlora të cilat kanë po ashtu përqindjen më të lartë të popullsisë jo aktive në tregun e punës me mbi 40%.

Në anën tjetër, Berati, Korça dhe Elbasani kanë nivelet më të ulëta të popullsisë jo aktive në tregun e punës.

Në të gjithë vendin, popullsia joaktive në fund të vitit 2022 ishte rreth 860 mijë persona sipas INSTAT, duke përfshirë të gjithë personat që nuk klasifikohen si të punësuar dhe as të papunë.

Personat joaktivë, ose jashtë forcës së punës, janë persona që nuk punojnë, dhe as kërkojnë apo duan punë sepse janë duke vazhduar shkollën, janë në pension apo me aftësi të kufizuara, mund të jenë duke përmbushur detyrat shtëpiake, ose nuk kërkojnë punë sepse besojnë se nuk mund ta gjejnë atë.

Shkalla e inaktivitetit jashtë forcave të punës llogaritet duke pjesëtuar popullsinë joaktive me popullsinë e së njëjtës grupmoshë. Ky tregues është rreth 38% në 2022.

LEXO GJITHASHTU:

• INSTAT: Rriten aksidentet si pasojë e sjelljes së këmbësorëve
• Bien abortet tek adoleshentët, INSTAT publikon trendin gjatë 5 viteve të fundit