Interi “poker” ndaj Atalantës, zikaltrit shkëputen nga Juventus

Diferenca me vendin e dytë ka shkuar në 12 pikë me Interin që konfirmon dhe një herë tjetër që nuk ka rivalë në kampionatin Italian. Zikaltrit luajtën mbrëmjen e së mërkurës në shtëpi ndaj bergamaskëve të Gasperinit, duke i mposhtur këta të fundit në shifrat 4-0. Një sfidë e dominuar plotësisht nga kryesuesit e Serisë A të cilët kaluan në avantazh në minutën e 26’, ndërsa dyfishuan me Lautaro Martinez në fundin e pjesës së parë, por më parë Atalantës iu anullua një gol me autor De Ketelaere, për prekje të topit me dorë.

Në pjesën e dytë Lautaro shpërdoroi një 11 metërsh me gjuajtjen e tij që u prit nga portieri, por topi i kthyer gjeti Di Marcon që e dërgoi në rrjetë, ndërsa më tej Fratessi vulosi triumfin 4-0. Kjo ishte fitorja e 22-të për Interin në kampionat, ndërsa udhëheq me 12 pikë më tepër se Juventusi i vendit të dytë.

3 pikë me shumë vlerë regjistroi dhe Napoli i cili fitoi ndaj Sassuolos me rezultatin e thellë 1-6. Të besuarit e Calzonës pësuan gol në minutën e 17’ me Racic që i dha avantazhin vendësve, por napoletanët përmbysën gjithcka që në fraksionin e parë me Rrahmanin dhe një dygolësh të Osimhen. Në pjesën e dytë ishte sërish bomber Nigerian që hipotekoi tripletën, e pas tij Kvaraskhelia që shënoi një dy golësh duke dërguar shifrat në 1-6. Kampionët në fuqi nuk fitonin që prej 4 shkurtit, ku mposhtën asokohe Veronën.

LEXONI GJITHASHTU:

• Interi, “poker” ndaj Leçe, zikaltrit 19 ndeshje pa humbje në Serinë A
• Klopp fiton një tjetër trofe, Liverpool mposht në finale Chelsea