Janari shënon kulmin e virozave, mjekët: Mos merrni ilaçe pa rekomandim

Muaji Janar shënon pikun e virozave stinore, ndaj dhe mjekët apelojnë për kujdes të shtuar sidomos tek fëmijët dhe moshat e treta, që kryesisht kanë dhe probleme të tjera shëndetësore.

“Viroza që po qarkullon është tipike e një viroze me shenja gripale, duke filluar nga temperaturë, kollë, sekrecione, dhimbje barku, të vjella dhe situata më e rriskuar është ata me imunitet të rëndë dhe pacientët e moshës së tretë”, tha mjekja patologe Marina Gjana.

Mjekët thonë se të sëmurët kërkojnë ndihmën e tyre, kur viroza i ka prekur prej disa ditësh, duke ndikuar në gjendjen e tyre shëndetësore.

“Numri i pacientëve dhe flukset rriten, qoftë dhe në urgjenca. Nuk mund të them që situata është jashtë kontrollit, patjetër është një situatë që mund të mbivendoshen anabakteriale dhe për shkak të rënies së imunitetit, shumë pacientë janë prekur dhe nga bronkopleumonitë, situatë më problematike, që kërkon trajtimet spitalore”, tha Gjana.

Marrja e ilaçeve pa rekomandimin e mjekut, është një tjetër arsyje përse shumë pacientë, nuk shohin përmirësim, duke u rënduar klinikisht. Mjekët këshillojnë hidratim sa më të shumë, konsumimin e lëngjeve si dhe qëndrimin në ajër të pastër, duke shmangur turmat. Deri më tani raportohen mbi 11 mijë të prekur  në javë, por jo të gjithë kërkojnë ndihmën e mjekut, ndaj shifra mund të jetë më e lartë.

LEXONI GJITHASHTU:

• Virozat agresive të stinës, mbushet spitali i Korçës, mbi 80 vizita në 24 orë
• Kurba e virozave në rënie, ISHP: 10.440 persona shkuan tek mjeku në një javë