Jorida Tabaku: Qeveria rrëzoi paketën antikorrupsion vetëm se e propozoi opozita

Deputetja e Partisë Demokratike Jorida Tabaku tha në një video të publikuar në faqen e saj në Facebook, se roli i opozitës dhe hapësira e saj në parlament është totalisht e kufizuar nga qeveria.

Ajo tha se ditën e sotme në të cilën prezantohej progres-raporti i BE, që theksonte luftën kundër korrupsionit si më kryesoren në Reformat që duhen ndërmarrë për Shqipërinë në BE, mazhoranca rrëzon propozimet e paketës antikorrupsion, dhe arsyeja e vetme sipas saj ishte se këto i propozonte Partia Demokratike.

“Sot fatkeqësisht parlamenti votoi kundër iniciativave të Partisë Demokratike në ligjin e Koncesioneve dhe PPP-ve. Ligje të hartuara në standardet më të mira të BE të cilat vendosin nën fre korrupsionin  në sektorin më të korruptuar në Shqipëri atë të kontratave publike. Ku kishim parasysh ndalimin e kompanive offshore, ndalimin e kompanive pa kapitale, pa asete, kompanive që nuk kryejnë punët publike.

Qartësisht kishim vetëm një problem,  i propozonte opozita. Sot, sektori i koncesioneve, PPP-ve siç thotë Progres raporti është nga sektorët më të pakontrolluar ndaj është e nevojshme ta vendosim atë në binarët e ligjit.

Por nga ana tjetër  ashtu siç thotë dhe Progres Raporti dhe hapësira e opozitës në parlament pikërisht për të ushtruar këtë rol; për të propozuar ligje, për të hetuar, për të kontrolluar, për të mbikëqyrur qeverinë është totalisht e kufizuar”,-tha Jorida Tabaku.

LEXONI GJITHASHTU:

• Tabaku: Presioni i opozitës dhe BE ndihmoi Shqipërinë të largohej nga Lista Gri
• Tymuese në Parlament, Tabaku: Secili ka të drejtën e vet si e shpreh revoltën