Skënderbeu ka avancuar në finalet e kampionatit shqiptar të volejbollit për femra, pasi mposhti në gjysmëfinale Pogradecin. Faza vendimtare luhet përballë Tiranës.

Skënderbeu është shumë pranë titullit kampion në volejboll për femra, trofe të cilin do të duhet ta fitojë në duelin ndaj Tiranës. Vajzat korçare kaluan me shumë meritë në fazën vendimtare të garës, pasi morën një fitore më herët ndaj Pogradecit, që nuk ishte dhe aq e lehtë.

U desh një përballje e tretë mes tyre për të konfirmuar biletën për korçaret, të cilat e mbyllën me 2 fitore në trion e derbit. Ndeshja e fundit e luajtur në “Tamara Nikolla” u fitua 3-2 nga të besuarat e Orlando Kojës, i cili në përfundim analizoi sfidën.

“Ndeshje e fortë, e dinim që Pogradeci do jepte maksimumin, ishte nivel i lartë, kështu që jemi të lumtur që dolëm në finale ndaj një kundërshtari që meritonte shumë”-tha Orlando Koja.

“Ndeshja ishte me rivalitet, sic e pamë, urime Pogradecit, por besoj ne e merituam finalen”,-tha Elena Bego.  

Për një nga lojtaret me te rëndësishme pogradecare si Paola Gjata, është arritje që u rikthye fryma e volejbollit në qytet bashkë me tifozët ndërsa tregon se tanimë Pogradeci do të shohë vetëm objektiva për lart

“ Jam shumë krenare që i sollëm tifozët në shkallët e stadiumit, shumë krenare që arritëm deri këtu”,-u shpreh Paola Gjata.

Titulli kampion do të vendoset tani nëpërmjet setit të finaleve që luhet mes Skënderbeut dhe Tiranës.