Kisha ortodokse në RMV në protestë, kundërshton ligjet për ndryshimin e gjinisë

Qindra qytetarë në Maqedoninë e Veriut kanë protestuar kundër draft-ligjit për barazi gjinore dhe të gjendjes civile.

Zyrtarët e Kishës Ortodokse Maqedonase vlerësojnë se draft-ligjet për barazi gjinore paraqesin kërcënim serioz për shoqërinë pasi ato janë në kundërshtim me “vlerat familjare”.

Drejtuesit e Kishës thanë se “ndryshimet mund të plotësojnë kërkesat e një grupi të caktuar, por në anën tjetër shkelin të drejtat e 99 përqind të qytetarëve”.

Kisha Ortodokse Maqedonase kundërshton në veçanti pikën 3 të nenit 4 të draft-ligjit për barazi gjinore, i cili ende nuk është dorëzuar për miratim në qeveri, dhe në të cilin thuhet:

Neni 4, pika 3: “Identiteti gjinor” i referohet ndjenjës së brendshme dhe individuale që secili person ndjen thellë në veten e tij të shpreh ndryshe gjininë e tij duke përfshirë emrin, veshjen, fjalimin, sjelljet dhe gjininë.

Ndërsa në draft-ligjin për librat e gjendjes civile, që është dorëzuar në Kuvend nga një grup deputetësh, parashikohet që personat të mund ta ndryshojnë gjininë varësisht ndjesive të tyre.

Bashkësia Fetare Islame ka mbështetur protestën e organizuar nga Kisha Ortodokse Maqedonase. Edhe pse e kanë përkrahur protestën, krerët e Bashkësisë Fetare Islame thanë se nuk ishin pjesë fizikike e saj.

Pas reagimit të Kishës Ortodokse Maqedonase, partia maqedonase në pushtet, Lidhja Social Demokrate ka vendosur ta tërheqë nga procedura projektligjin për evidencën amë, por nuk është tërhequr nga synimi për miratimin e tij.

Organizatat joqeveritare të bashkuara në Platformën “Rrjeti për Barazi Gjinore dhe Rrjeti për Mbrojtje nga Diskriminimi” kanë theksuar se protesta e Kishës Ortodokse Maqedonase ka për qëllim që t’u bëjë presion autoriteteve të shtetit që të tërheqin projektligjet për barazi gjinore.

LEXONI GJITHASHTU: 

• Hungaria kundërshton planin e BE-së për më shumë fonde për Ukrainën
• Korrupsioni me tenderat e MSH, Apeli i GJKKO lë në qeli inxhinierin Silvi Shehu