Kolegji Zgjedhor merr vendimin, pranon afatet e reja të propozuara nga KQZ

Kolegji Zgjedhor ka pranuar afatet e reja të propozuara nga Komisioni Qendror i Zgjedhjeve që lidhen me zhvillimin e zgjedhjeve të pjesshme në 9 nëntor.

Komisioni Qendror i Zgjedhjeve propozoi afate të reja (kjo për shkak se disa afate kanë kaluar si: regjistrimi i partive dhe kandidatëve të pavarur që ne draftin e vjetër kanë qenë në datë 11 tetor).

Afatet e reja të propozuara nga KQZ parashikojnë 16 tetorin si data e fundit për regjistrimin e partive si edhe komitetet për kandidatët e pavarur.

“Partitë politike duhet të paraqesin kërkesën në KQZ, për regjistrim si subjekte zgjedhore, për zgjedhjet e pjesshme për Kryetar në Bashkitë Berat, Tepelenë, Cërrik, Mat dhe Vlorë, jo më vonë se data 16.10.2025. KQZ-ja kthen për plotësim dokumentacionin brenda 24 (njëzet e katër) orëve nga dorëzimi. Partitë politike paraqesin dokumentacionin e korrigjuar brenda 24 (njëzet e katër) orëve nga kthimi për plotësim. Komisioneri Shtetëror i Zgjedhjeve miraton kërkesat për regjistrim brenda 24 (njëzet e katër) orëve nga ridërgimi i dokumentacionit.

“Komitetet Nismëtare duhet të paraqesin kërkesën për regjistrim në KQZ për bashkitë Vlorë dhe Berat, si dhe në KZAZ-në përkatëse për bashkitë Tepelenë, Cërrik dhe Mat, jo më vonë se data 16.10.2025. KQZ-ja ose sipas rastit KZAZ-ja kthen për plotësim dokumentacionin brenda 24 (njëzet e katër) orëve nga dorëzimi. Komitetet Nismëtare paraqesin dokumentacionin e korrigjuar brenda 24 (njëzet e katër) orëve nga kthimi për plotësim. KQZ-ja ose sipas rastit KZAZ-ja miraton kërkesat për regjistrim brenda 24 (njëzet e katër) orëve nga ridërgimi i dokumentacionit”, thuhet në vendimin e Kolegjit.

LEXONI GJITHASHTU:

• Zgjedhjet e pjesshme lokale, KQZ: Fushata nis në 1 nëntor
• Berisha për zgjedhjet në Kosovë: Model demokracie, mesazh për Shqipërinë