Komisioneri i BE për Fqinjësinë dhe Zgjerimin, Oliver Varhelyi do të zhvillojë sot vizitën e tij të parë zyrtare në Republikën e Maqedonisë së Veriut, ku do të takohet me Presidentin Stevo Pendarovski, Kryeministrin Oliver Spasovski dhe kryetarin e Kuvendit Talat Xhaferi.
Ai gjithashtu do të takohet me kryetarin e LSDM-së Zoran Zaev dhe liderin e OBRM-PDUKM-së Hristijan Mickoski.
Në takimet e programuara me liderë të lartë të vendit do të diskutohet për metodologjinë e re të zgjerimit të propozuar nga Franca dhe rrjedhën e reformave në vend, veçanërisht miratimin e ligjit për Prokurorinë Publike.
Vizita e Komisionerit Varhelyi në rajon vijon nesër në Tiranë.
Në një deklaratë për shtyp përpara nisjes së tij, Varhelyi tha se vizitat e tij synonin të theksonin angazhimin e komisionit për perspektivën e anëtarësimit të dy vendeve.
“Duke udhëtuar në vizitën time të parë si komisioner në Ballkanin Perëndimor, në Maqedoninë e Veriut dhe Shqipëri, dua të dërgoj një sinjal të fortë se për Komisionin dhe për mua personalisht perspektiva e Bashkimit Europian për këtë rajon është prioritet,” tha z. Varhelyi.
“I qëndrojmë propozimit tonë për të hapur bisedimet e anëtarësimit me të dyja vendet dhe po punojmë për ta bërë realitet sa më shpejt,” shtoi ai.
Komisioneri i Fqinjësisë dhe Zgjerimit veçoi vizitën që do të ketë në Durrës, qytetin bregdetar që u prek ndjeshëm nga tërmeti i nëntorit të shkuar dhe kujtoi konferencën ndërkombëtare të donatorëve që do të mbahet në Bruksel më 17 shkurt.
Komisioni Evropian do të publikojë një mini-raport për Maqedoninë e Veriut dhe Shqipërinë në shkurt, ndërsa metodologjia e re, pritet të miratohet në mars.
