“Kosova ka nevojë për Shqipërinë”/ Arifi: Kurti të bënte lëshime ndaj Ramës

Profesori i Shkencave Politike, Dritëro Arifi, foli në një lidhje direkte për Euronews Albania për zhvillimet më të fundit në Kosovë dhe marrëdhënien që ka kjo e fundit me Shqipërinë.

Ai e cilësoi kryeministrin e Shqipërisë Edi Rama si një ‘liberal të pakuptimtë’ dhe homologun e tij kosovar si një ‘patriot të pakuptimtë’.

“Z. Rama është një liberal i pakuptimtë dhe z. Kurti është një patriot i pakuptimtë, pra kështu i kisha përkufizuar të dy liderët”,  tha Arifi.

Gjithashtu ai shtoi se Kurti duhej të tregohej më pragmatist në qasje me Ramën, pasi kjo do e ndihmonte Kosovën të avanconte akoma edhe më shumë. Më tej ai shtoi se Kurti duhet të bënte disa lëshime ndaj kryeministrit shqiptar në mënyrë që të avancojë më shumë në raport me Shqipërinë dhe ndërkombëtarët.

“Kosova ka më shumë nevojë për Shqipërinë sesa Shqipëria për Kosovën dhe në këtë këndvështrim Z. Kurti është dashur që të tregohet më pragmatist në qasje edhe nëse ndonjëherë z. Rama i ka bërë disa gabime, Z. Kurti për shkak të avancimit të Republikës së Kosovës është dashur që të bëjë disa lëshime të vogla vetëm që Republika e Kosovës të avancojë akoma më shumë në raport me Shqipërinë dhe në raport me ndërkombëtarët, jam i bindur që të huajt na përqeshin, thonë, këta nuk janë të aftë të komunikojnë mes veti”, tha ai.

LEXONI GJITHASHTU: 

• Parcelë me kanabis në repartin ushtarak të Zall Herrit, pezullohen ushtarakët
• Megaoperacioni “FOKUS”, 12 të arrestuar, sekuestrohen 17000 bimë kanabis gjatë javës