Kreshnik Spahiu: Rama, Berisha dhe Meta s’do dënohen nga drejtësia, kanë marrëveshje

Juristi Kreshnik Spahiu thotë se kryeministri Edi Rama, kryetari i Partisë Demokratike, Sali Berisha dhe kreu i Partisë së Lirisë, Ilir Meta janë të paprekshëm dhe se nuk do të dënohen asnjëherë nga drejtësia.

Në një intervistë për Euronews Albania, Spahiu u shpreh se drejtësia është nën kontroll nga politika dhe se ata kanë një marrëveshje shumë të fortë me njëri-tjetrin për të mos u prekur.

Sipas tij, prokuroria nuk i merr në pyetje të tre liderët, as në cilësinë e dëshmitarit, e jo më si të pandehur.

“Shiko. Pse unë jam një profesionist që besoj që tre liderët politikë, Rama, Berisha dhe Meta do të jenë të paprekshëm. Unë mendoj që ata nuk do dënohen ndonjëherë nga drejtësia në Shqipëri, sepse drejtësia e sotme është tërësisht në një kontroll politik. Këta tre liderë politikë kanë një marrëveshje shumë të fortë me njëri-tjetrin për të mos u prekur. Ata e mbështesin njëri-tjetrin.

Si mund të merret i pandehur njëri nga këta të tre, kur thuhet që kemi vite që i hetojmë, por nuk kanë guxuar as t’i thërrasin në cilësinë e dëshmitarit. Kur ti si prokurori nuk guxon ta thërrasësh për ta pyetur në cilësinë e dëshmitarit, si do e marrësh me cilësinë e të poandehurit? Çfarë e ka penguar prokurorinë shqiptare 10 vjet, që të marrë Berishën dëshmitar për çështjen e Gërdecit, kur dyshohet që ka përfituar drejtpërdrejt nga fabrika e armëve”, theksoi ai.

Ditën e djeshme, në një intervistë ekskluzive për Euronews Albania, drejtuesi i Prokurorisë së Posaçme (SPAK), Arben Kraja bëri të ditur se Ilir Meta është në hetim për dosjet që janë dorëzuar për financimet në parti.

Lidhur me çështjet e kompleksit Partizani dhe Gërdecin, Kraja nënvizoi se janë nën hetim.

LEXONI GJITHASHTU

• Ekskluzive/ E zbulon kreu i SPAK: Ilir Meta është nën hetim
• A do ketë arrestime të politikanëve për inceneratorët? Përgjigjet Arben Kraja
• Do merret në pyetje Berisha për kompleksin Partizani dhe Gërdecin? Flet Arben Kraja