Kryepeshkopi Joan, uron besimtarët myslimanë për Fitër Bajramin

Kryepeshkopi i Kishës Ortodokse Autoqefale të Shqipërisë vizitoi këtë të dielë selinë e Komunitetit Mysliman të Shqipërisë për të uruar besimtarët me rastin e Fitër Bajramit.

Kryepeshkopi Joan u prit nga kryetari i Komunitetit Mysliman, zoti Bujar Spahiu.

Gjatë vizitës së tij, Kryepeshkopi Joan theksoi rëndësinë e bashkëjetesës ndërfetare në Shqipëri, duke e cilësuar atë si një nga pasuritë më të mëdha që ka vendi ynë, të cilën mund ta përçojmë edhe jashtë kufijve tanë.

“Si çdo pasuri, duhet të kujdesemi për të, ashtu siç janë kujdesur paraardhësit tanë, drejtuesit e mëparshëm të komuniteteve fetare. Kështu, kemi përgjegjësinë t’ia trashëgojmë atë brezave që do të vijnë. Për këtë nuk mjafton vetëm puna e klerikëve të secilit komunitet, por të gjithë duhet të japin kontributin e tyre”, tha ai.

Kryepeshkopi Joan shtoi se Perëndia nuk do të na gjykojë vetëm për rezultatin, por mbi të gjitha për përpjekjen që kemi bërë.

Gjatë vizitës së Kryepeshkopit, i pranishëm ishte edhe Mons. Arjan Dodaj, kreu i Arqidioqezës së Tiranës dhe Durrësit të Komunitetit Katolik ndërsa takimi u zhvillua në klimë mjaft miqësore.

LEXONI GJITHASHTU:

• Fronëzimi i Kryepeshkopit Joan, Papa Françesku dërgon letër urimi
• “Vazhdoftë denjësisht udhën”, Spiropali uron Kryepeshkopin Joan në Fronëzimin e tij