Kulla, resorte, hotele dhe parqe fotovoltaike janë disa nga objektet kryesore që pritet të ndërtohen muajt në vijim në Tiranë dhe në zonat bregdetare. Lejet për këto projekte janë miratuar nga Këshilli Kombëtar i Territorit (KKT).
Disa prej kullave në kryeqytet do të kalojnë 40 kate. Një prej tyre, “Sun Moon Star”, e cila do të ndërtohet në rrugën “Asim Vokshi”, do të ketë 44 kate mbi tokë dhe 7 kate nën tokë. Një tjetër godinë shumëkatëshe, me një lartësi prej 54 metrash, është planifikuar për ndërtim në rrugën “Panorama”, në vendin e Kadastrës.
Po ashtu, janë miratuar leje për ndërtimin e kullave të tjera me 44 dhe 55 kate mbi tokë dhe nga 5 kate nëntokë në rrugën “Dritan Hoxha”.
Projektet nuk kufizohen vetëm në kryeqytet. Në zonat bregdetare janë planifikuar disa hotele dhe resorte. Në Shëngjin do të ndërtohet një hotel me 25 kate, ndërsa në Vlorë një tjetër me 23 kate. Ndërkohë, resorte të tjera do të ndërtohen në Zvërnec, Jalë dhe Palasë.
Ndërkaq, lejet e dhëna për zhvillimin e parqeve fotovoltaike për prodhimin e energjisë janë fokusuar kryesisht në Fier.
LEXONI GJITHASHTU:
- “Në Sarandë 3 mijë €/m2” Eksperti: Pse janë rritur çmimet e apartamenteve në bregdet
- Elbasan| Rriten çmimet e apartamenteve, 1 m2 shitet 30% më shtrenjtë se në 2022-shin
