Kulluri: Marrëveshja Berisha-Meta pozitive, por PD duhet të rritet në tërësinë e vet

Analisti Edvin Kulluri e ka konsideruar pozitive, marrëveshjen e nënshkruar mes kryedemokratit, Sali Berisha dhe kreut të Partisë së Lirisë, Ilir Meta për zgjedhjet vendore të 14 majit 2023.

Në një intervistë për Euronews Albania, Kulluri u shpreh se më e rëndësishme do ishte bashkimi i Partisë Demokratike dhe rritja e saj në tërësi.

“Padyshim, më mirë se të dalin veç e veç. Të dyja partitë i ndihmojnë kandidatët e njëra-tjetrës në numër votash. Partia e Lirisë, nën siglën e LSI-së, një vit më parë mori rreth 90 mijë vota, nuk janë pak. Është partia e tretë më e madhe në vend. Së bashku me koalicionin e djathtë, shkruan në rreth 720 mijë vota në total, diku te 70-80 mijë më pak se Partia Socialiste me Partinë Social Demokrate.

Nuk e di a do të mjaftonte Partia e Lirisë që të ishte faktori që do i jepte fitoren opozitës. Marrëveshja është pozitive, por a i jep fitoren apo jo, është shumë më e parëndësishme kjo marrëveshje e sotme, se sa një rritje e PD-së në tërësinë e vet”, theksoi ai.

Mesditën e sotme, Meta dhe Berisha firmosën marrëveshjen për zgjedhjeve vendore të 14 majit të vitit të ardhshëm.

Në dokumentin e siguruar nga Euronews Albania, Meta dhe Berisha dakordësohen në 6 pika, midis të tjera nënvizohet se në zgjedhje do të hyjnë me kandidatë të përbashkët.

Po kështu, Këshillat Bashkiakë, si institucionet më të rëndësishme të përfaqësimit të qytetarëve, do të drejtohen nga përfaqësues të propozuar nga Partia e Lirisë.

LEXONI GJITHASHTU

• Berisha e konfirmon: Këlliçi ka shprehur dëshirën për të kandiduar përballë Veliajt
• Berisha: Marrëveshjet që kam nënshkruar unë sollën fitore, Basha vetëm humbje

• Ekskluzive | Belind Këlliçi kandidati i PD dhe PL për Tiranën