Kurban Bajrami në RMV, krerët fetarë thirrje besimtarëve për solidaritet, tolerancë dhe harmoni

Edhe besimtarët myslimanë në Maqedoninë e Veriut po e festojnë Kurban Bajramin me traditat e zakonshme. Manifestimi qendror i faljes së Bajramit u zhvillua në Shkup. Prej aty krerët fetarë bënë thirre për solidaritet, tolerancë dhe afrim me njëri tjetrin.

“Sot, nesër dhe ditën e tretë të Kurban Bajramit do të ndahet mishi i Kurban Bajramit të gjithë njerëzve, pa marrë parasysh besimin, etninë, e kështu me radhë, me çka do të tregojnë në praktikë se ky ibadet, ky obligim, është paqe në mes njerëzve, është solidaritet, është humanitet, është afrim me njeri-tjetrin, është shërbim ndaj të tjerëve”, tha Shaqir Fetahu, kryetar i bashkësisë islame RMV.

Kurban Bajrami në Maqedoninë e Veriut përcillet tradicionalisht me bakllava dhe ëmbëlsira të tjera, ndërsa familjet që kanë mundësi bëjnë kurban dhe mishin ua shpërndajnë të varfërve. Pjesë e traditës janë edhe vizitat tek të afërm dhe familjarë.

Për këtë festë nuk do të ketë masa shtesë për shkak të COVID-19, mirëpo autoritetet shëndetësore por edhe ato fetare porositën besimtarët të kenë kujdes maksimal dhe të respektojnë masat që janë në fuqi.

LEXONI GJITHASHTU:

• Një tjetër Kurban Bajram që nuk festohet në xhaminë e Namazgjasë
• Besimtarët myslimanë festojnë sot Kurban Bajramin, falin namazin pranë xhamive