Kurti takohet me Escobar-in në Ohër, ja për çfarë diskutuan

Kryeministri i Kosovës, Albin Kurti u takua në Ohër me të dërguarin e SHBA-ve për Ballkanin Perëndimor, Gabriel Escobar, në kuadër të dialogut për normalizimin e marrëdhënieve Kosovë-Serbi.

Përmes një njoftimi të qeverisë së Kosovës, bëhet e ditur se Kurti dhe Escobar diskutuan për rëndësinë dhe pritshmëritë nga takimi që Kurti do të zhvillojë po ditën e sotme me presidentin e Serbisë, Aleksandër Vuçiç.

“Krahas takimit të djeshëm në Prishtinë, sot në Ohër, në prag të takimit të radhës të nivelit të lartë në kuadër të dialogut për normalizimin e marrëdhënieve Kosovë–Serbi, Kryeministri i Republikës së Kosovës, Albin Kurti, takoi të Zëvendës ndihmës Sekretarin e Shteteve të Bashkuara për Çështje Evropiane dhe Euroaziatike dhe njëherësh të dërguarin e posaçëm të Shteteve të Bashkuara të Amerikës për Ballkanin Perëndimor, Gabriel Escobar.

Folën për takimin e sotëm, rëndësinë dhe pritjet nga ky takim. Kryeministri Kurti e falënderoi z. Escobar për mbështetjen vazhdueshme të tij dhe të ShBA-së në procesin e dialogut, duke theksuar këtu përkushtimin dhe qasjen konstruktive të Qeverisë së Republikës së Kosovës në këtë fundjavë dhe për gjatë gjithë procesit”, thuhet në njoftimin e qeverisë së Kosovës.

LEXONI GJITHASHTU

• Escobar: Nuk jemi të fokusuar te nënshkrimi, por te finalizimi i marrëveshjes
• “Kam ardhur për të biseduar për marrëveshje”, Kurti flet para takimit me Vuçiçin
• Kovaçevski takon Kurtin dhe Vuçiçin: Bisedimet, të rëndësishme për paqen në rajon