Kushi për shkrirjen e ASA: Në 8 vite asnjë student, do e ngremë në nivel tjetër

Ministrja e Arsimit Evis Kushi tha në interpelancën e mbajtur këtë të enjte lidhur me shkrirjen e Akademisë së Studimeve Albanologjike se qëllimi i VKM-së së miratuar është që ky institucion të ngrihet në një nivel të ri.

Kushi tha se në këtë formë të gjithë studiuesit dhe akademitë do jenë bashkë për të vijuar me projekte më të mëdha nga sa janë realizuar deri më tani, ndërsa sipas saj akuzat e opozitës se po “zhdukin 100 studiues” ajo tha se janë të pavërteta e të pabaza.

“Nuk bëhet fjalë as për zhdukje dhe as shkrirje, vendimi parashikon bashkim. Do e ngremë në një nivel të ri. Merrni shkresat që i jam drejtuar në dhjetor të 2021 Akademisë së Studimeve Albanologjike që të riorganizohet në përputhje me ligjin. Ne jemi institucion që bëjmë ligje dhe të justifikojmë shkeljen e ligjit?! Një akademi duhet të ketë  një fakultet, sipas ligjit… Nuk e ka! Prej 8 vitesh nuk është regjistruar asnjë student. Është vetë institucioni që aplikon për mbylljen e institucionit, por nuk e kanë bërë. Kanë doktorantë prej vitesh dhe nuk po i  çojnë drejt finalizimit.

Ju po bëni sikur ne po i zhdukim… si po i zhdukim? Se thoni po zhdukin 100 studiues. Përkundrazi këta 100 studiues do ngrihen në një nivel të ri, se pikërisht ky është qëllimi i VKM-së. Qëllimi është që të riorganizohet të vijë në përputhje me ligjin dhe përveç kësaj ta ngrejë në një nivel të ri. Akademia e Shkencave është maja, është institucioni majë i shkencës në vend, përfshirë këtu edhe Albanologjinë dhe është nder për ne që ti kemi të gjithë studiuesit dhe akademikët bashkë për të vijuar projektet e mëdha”,-tha Evis Kushi.

LEXONI GJITHASHTU:

• Qarkulloi 250 milionë euro para të pista, kush është shqiptari i arrestuar në Greqi
• INSTAT: Çdo orë 5 shqiptarë ikin nga vendi, shumica nuk kthehen më