Lajla Përnaska: Mjekësia është edhe biznes, por thelbi mbetet humanizmi

Mjekia, sipërmarrësja e politikania Lajla Përnaska është shprehur se në ditët e sotme mjekësia në njëfarë mënyre është kthyer edhe në biznes.

Komentet Përnaska i bëri në emisionin “Good Morning Albanians” në Euronews, ku tha se megjithëse në disa aspekte mjekësia shihet si mënyrë fitimi, sërish thelbi i saj është humanizmi.

Ajo foli gjithashtu edhe për jetën e saj në fushën e mjekësisë, studimet dhe specializimet në vende të ndryshme të botës.

“Kjo mënyrë e të organizuarit që nga mendësia jonë, nëpërmjet këtyre informacioneve e dijeve që t’i përditësojmë e t’i bëjmë tonat në jetën e përditshme, është në favor të shëndetit, të jetëgjatësisë.

E kam përqafuar me shumë dëshirë mjekësinë, që nga momenti që nisa studimet. Kam arritur maksimumin e rezultateve në fakultet, pastaj jam specializuar në Francë, në Paris. Pastaj kam bërë trajnime në shtete të ndryshme, që nga SHBA e deri në Izrael e Indi.

Gjithë rrugëtimi e ecuria e jetës sime në mjekësi ka pasur që nga aktiviteti klinik, deri te shëndeti publik, te politikbëria. Kështu që e kam ruajtur marrëdhënien time me fushën e shëndetësisë, duke kontribuar në përgatitjen e politikave, të ligjeve dhe kam gjetur mënyrën që përshtatet me natyrën time për të përcjellë njohuritë te të tjerët përmes botimeve.

Shëndetësia në një këndvështrim është kthyer në biznes, në një pjesë të saj po. Por thelbi i mbetet humanizmit si një shkencë humane. Unë besoj te çdo mjek se është brenda tij pjesa e humanizmit, pavarësisht ndikimit komercial dhe pjesës që lidhet me fitimin në shëndetësi”, tha Përnaska.

LEXONI GJITHASHTU:

• Rihapen thirrjet për specializime në mjekësi urgjence dhe familjeje
• Çfarë parashikon projektligji i ri për studentët e mjekësisë