“Lezha simbolizon besën”, Berisha premton ndryshime të mëdha pas 100 ditësh

Kreu i Partisë Demokratike, Sali Berisha, ka mbyllur fushatën elektorale në Lezhë, duke e cilësuar këtë qytet si një simbol të besës dhe bashkimit të shqiptarëve.

Gjatë fjalës së tij, Berisha falënderoi qytetarët e Lezhës për mbështetjen dhe u bëri thirrje shqiptarëve të bashkohen më 11 maj për të votuar Partinë Demokratike si mundësi për të sjellë ndryshimin dhe për të larguar “mjerimin dhe skamjen” që, sipas tij, e ka shkaktuar qeveria e Edi Ramës.

Në fjalimin e tij, Berisha përmendi disa nga premtimet që PD ka për qytetarët. Ai nënvizoi se brenda 100 ditëve të para të qeverisjes, PD do të bëjë ndryshimin e madh që Shqipëria ka nevojë duke përfshirë rritje të rrogave, ulje të taksave dhe përmirësim të kushteve për bizneset e vogla.

“Në 100 ditë, çdo pensionist që merr më pak se 172 mijë lekë, do të marrë të paktën 200 euro. Po ashtu, çdo qytetar i Lezhës dhe i Shqipërisë do të ketë një rrogë minimale prej 500 eurosh. Çdo pensionist do të ketë kartën e konsumatorit për të përfituar çmime më të ulëta për produktet bazë”, tha Berisha.

Në fund të fjalës së tij, Berisha përmendi se, me fitoren e PD-së, Shqipëria do të bëjë një hap të madh përpara dhe do të ndalë skamjen dhe mjerimin. Ai e mbylli fjalimin duke theksuar se “në 100 ditë, Shqipëria do të ndryshojë rrënjësisht, dhe Lezha do të jetë shembulli i parë i këtij ndryshimi.”

LEXONI GJITHASHTU:

• PD mbyll fushatën në Shkodër, Berisha shpall prioritetet për ekonominë dhe arsimin
• Gazetari amerikan deklaroi se Berisha mund të udhëtojë në SHBA, reagon PD