Lufta rrënon turizmin ukrainas, plazhe të minuar

Plazhet e Detit të Zi në Odesa janë të ndaluara për banorët, të cilët shohin nga larg rërën e bardhë, që fsheh kurthe për ushtarët rusë.

Në fillim të luftës, ushtria ukrainase vendosi aty mina për të parandaluar zbarkimin e rusëve. Por shumë shpresojnë se do të mund ta shijojnë bregun kur të mbërrijë vera.

“Besoj se njerëzit do të shkojnë në plazh, sepse qytetarët e Odesës nuk ndalen kur bëhet fjalë për detin. Mendoj se më shumë njerëz do ketë vitin e ardhshëm, kur sezoni do të jetë më i mirë dhe njerëzit do jenë më të relaksuar”, u shpreh një qytetar.

Por pushtimi rus ka gjasa të lërë pasoja afatgjata ndaj industrisë turistike të vendit, sidomos për shkak të infrastrukturës së dëmtuar, përfshirë hotelet e shkatërruara.

Hoteli “Jules Verne” në Zatoka, në jug të Odesës, konsiderohej “shumë i mirë” në prenotimet online. Por, tani është tërësisht ndryshe.

Kompleksi u shkatërrua më herët gjatë muajit, kur një raketë ruse e qëlluar nga Deti i Zi ra pranë pishinës. Punonjësit deklaruan se të paktën 4 persona mbetën të plagosur. Për vete, ata falënderojnë Zotin që mbijetuan.

 Sektori ukrainas i turizmit dikur ka qenë një industri e zhvilluar. Rreth 30 milionë persona udhëtuan këtu në 2008-n. Shifra u tkurr që prej vitit 2014, kur nisi lufta në lindje dhe tani në nivelin më të ulët historik, me më pak se 3 milionë turistë që erdhën vitin e kaluar.

Fare pranë, një fqinje që zotëron një ‘bed & breakfast’ thotë se biznesi ishte jeta e saj, ndërsa tani ka mbetur pa punë dhe pa shpresë.

“Nuk kemi punë. Plazhi është i minuar. ky biznes është jeta jonë, unë duhet të ushqej tre fëmijët e mij, por aktualisht nuk kemi punë”, tha një qytetare.

Por, pjesa dërrmuese e ukrainasve thonë se humbjet materiale nuk janë asgjë krahasuar me ndjesinë e tradhtisë nga një vend që shumë njerëz këtu e konsideronin pjesë të familjes.

“Kam frikë, kam shumë frikë. Jam e tronditur. Nuk e kisha imagjinuar kurrë këtë. Vëllai im i madh jeton në Rusi dhe papritur na tha se jemi nazistë. Ne i thamë se po na qëllojnë, por ai tha se nuk ka të shtëna. Por ja që sulme ka. Këtë nuk e prisja. Për të gjithë ne Rusia dhe Ukraina ishin si motra. Është e tmerrshme”, u shpreh një qytetare.

LEXONI GJITHASHTU:

• Moska vijon bombardimet, Perëndimi pretendon se ushtria ruse është dobësuar