Marrëveshje finale në mars 2023? Analisti: Kur zgjidhet çështja Kosovë-Serbi

Analisti Leart Hoxha thotë se muaji mars i këtij viti, mund të mos jetë afati i fundit për një marrëveshje finale mes Kosovës dhe Serbisë.

Në një intervistë për Euronews Albania, Hoxha u shpreh se nëse nuk arrit marrëveshja në mars, ajo duhet të arrihet në gjysmën e parë të muajit prill.

Kjo sipas tij, pasi më 23 prill janë caktuar zgjedhjet në 4 komunat me shumicë serbe në veriun e Kosovës.

“Marsi mund të mos jetë afat final. Chollet ka qenë shumë i kujdesshëm në pyetjen time rreth afateve dhe asaj se kur mund të zhvillohet takimi i ardhshëm. Madje, është thënë që zbatimi i marrëveshjeve ekzistuese nuk do të vendoset si parakusht për takimin e ardhshëm. Nëse nuk është marsi një përparim në dialog, nuk po them një marrëveshje, por një përparim i dukshëm në dialog, do të duhet të ndodhë para gjysmës së prillit.

Më 23 prill, janë të caktuara zgjedhjet në 4 komunat me shumicë serbe në veriun e Kosovës. Janë zgjedhjet e jashtëzakonshme për kryetarë të atyre komunave që kanë bërë dorëheqje. Nëse në mars nuk ka marrëveshje, në prill duhet të ekzistojnë të gjitha kushtet që zgjedhjet të mbahen. Në mënyrë që kjo të ndodhë, duhet që Lista Serbe të kthehet në institucione dhe duhet që Kosova të ketë bërë përparime në dialog”, theksoi ai.

LEXONI GJITHASHTU

• Ministria e Punëve të Jashtme të Kosovës: Nuk ka dështuar anëtarësimi në KiE
• Përplasje ushtarake me Serbinë? Kurti: Shpresojmë që jo, por jemi të shqetësuar
• Kur pritet përshkallëzimi i radhës mes Kosovës e Serbisë? Kurti: Varet nga Beogradi