Masakra e Pragës/ Ish-pedagogia: Kozak i dërgoi mesazh një mikeshe dhe i tha…

Ish-pedagogia e Universitetit të Pragës, Kestrina Peza, ka folur për ngjarjen që “tronditi” mbarë Çekinë, ku një i ri sulmoi me armë zjarri duke lënë të vdekur 14 persona dhe duke plagosur disa të tjerë.

Përmes një lidhjeje me “Euronews Albania”, Peza tha se autori i sulmit, David Kozak, njihej si njeri i qetë në shkollë dhe ishte student me rezultate të shkëlqyera.

Ajo tha po ashtu se pasi vrau të atij, autori David Kozak i kishte dërguar mesazh një mikeshë të tij dhe i kishte thënë se do të kryente vetëvrasje. Kjo bëri sipas saj, që Policia të kishte informacion për ngjarjen më herët.

“Emri i tij është David Kozak. Ka mbaruar ciklin prej 3 vitesh të shkollës së lartë me nivel të shkëlqyer, madje ka marrë edhe çmim nga universiteti. Ka qenë student i shkëlqyer dhe nuk ka asnjë precedent. Ngjarja është e habitshme.

Numri i të vrarëve është 14, madje ai është i 15. Ai ka vrarë ditën e djeshme në mëngjes babain e tij dhe ka qenë i dyshuar për vrasjen e dy personave të tjerë, pra i babait dhe i një vajze 2 muajshe. Nuk dihej që ka qenë një person problematik, ka qenë shumë i thjeshtë.

Kolegët e tij flasin për një student të thjeshtë dhe të heshtur. Kryetari i Bashkisë nga vjen djali ka deklaruar se ata kanë qenë një familje shumë e mirë. Kur vrau të atij ai i dërgoi një mesazh një mikeshe të tij që kishte ndërmend të bënte vetëvrasje dhe ajo ka informuar autoritetet.

Ka qenë një periudhë e shkurtër që kur policia ka qenë e informuar se ai do të bënte diçka. Telefonin e ka pasur në shtëpi, pasi Policia e ka telefonuar disa herë. Ka qenë i pajisur me armë të shumta që i kishte me leje dhe kjo ka qenë arsyeja pse ai ka qenë në grupin e të dyshuarve për vrasjen e dyfishtë në pyll”, tha Peza.

LEXONI GJITHASHTU:

• Aksioni i policisë kundër 24-vjeçarit që vrau 14 persona në Pragë, publikohen pamjet
• Detaje nga masakra në Pragë: Autori vrau babain, një javë më parë zhduku një vajzë