Masat për foltoren e PD te kryeministria: 350 policë në terren, rrugët që bllokohen

Policia e Shtetit ka publikuar planin e masave në lidhje me garantimin e rendit dhe mbarëvajtjes së foltores së Partisë Demokratike para kryeministrisë, e cila do të mbahet si çdo të hënë nga ora 18:00 deri në 20:00.

Sipas burimeve të Euronews Albania, rreth 350 policë do të jenë në terren për sigurimin e zhvillimit të këtij aktiviteti politik, një shifër më e lartë se të hënat e kaluara, kur numri i efektivëve nuk i ka kaluar 250.

Nga ora 15:00 deri në përfundim të tubimit, do të ketë bllokim të qarkullimit të automjeteve në Bulevardin “Dëshmorët e Kombit”, nga kryqëzimi pranë Ministrisë së Brendshme deri te Sheshi “Nënë Tereza”, si edhe në rrugët “Ukraina e Lirë”, “Papa Gjon Pali II” dhe “Ismail Qemali”.

Në varësi të dinamikës së tubimit, mund të vendosen kufizime të përkohshme të qarkullimit edhe në akse të tjera rrugore.

Për të lehtësuar lëvizjen e qytetarëve, Policia e Tiranës ka parashikuar devijimin e trafikut në rrugë alternative.

Policia e Tiranës apelon që drejtuesit e automjeteve të shmangin lëvizjen në akset që do të bllokohen dhe të përdorin itinerare alternative, në mënyrë që të mos pengohet lëvizja e lirë e pjesëmarrësve në tubim.

LEXONI GJITHASHTU:

• Berisha nga foltorja në Elbasan: Tani është radha jonë, revoltë deri në fitore
• VIDEO/ Salianji dhe Alimehmeti mes protestuesve te foltorja e PD-së te kryeministria