“Mbledhja e sotme është nul”, Boçi: PD do jetë në komisionin për reformën territoriale

Nënkryetari i Partisë Demokratike, Luçiano Boçi, tha në një deklaratë për mediat pas mbledhjes së grupit të PD se mbledhja e sotme e Komisionit të Reformës Territoriale është nul pasi u thirr përmes ultimatumit nga Taulant Balla.

Boçi u shpreh se PD do vijojë të jetë pjesë e komisionit për reformën territoriale dhe për këtë siç tha, do të vërë në dijeni bashkëkryetarin e komisionit, Arbër Mazniku.

“Mbledhja e sotme është nul se u thirr në ultimatum nga Balla, që është e papranueshme. Mbledhja e komisionit thirret në bashkëpunim me bashkëkryetarët, unë si bashkëkryetar nuk jam njoftuar. Qëndrimi i PD është që ne do vijomë të jemi pjesë e komisionit të reformës territoriale dhe do vazhdojmë me axhendën e komisionit. Unë jam i detyruar, duke respektuar etikën, ta njoftoj bashkëkryetarin për gatishmërinë e grupit të PD dhe anëtarësisë së komisionit për të bashkëvijuar këtë reformë, që është shumë e rëndësishme që në fund të miratohet me konsensus”, tha Boçi.

Në mbledhjen e sotme të grupit të PD bëhet e ditur se ka pasur diskutime lidhur me mbarëvajtjen e veprimeve politike të ndërmarra nga demokratët, ku nuk ka pasur dakordësi për bojkotimin e propozuar nga kryetari Sali Berisha ndaj punimeve të Kuvendit.