Me kanabis, shkop gome dhe municion luftarak, arrestohen dy adoleshentët

Dy të rinj të moshës 18 dhe 17-vjeç janë arrestuar nga policia e Fierit pasi u ndaluan në flagrancë duke shitur kanabis në doza të vogla në lagje të ndryshme të qytetit.

Gjithashtu, nga kontrollet, shërbimet e Policisë iu gjetën këtyre shtetasve, fishekë luftarak dhe një shkop metalik si i Policisë, të cilët u sekuestruan në cilësinë e provës materiale, së bashku me një sasi lënde të dyshuar narkotike kanabis.

Materialet hetimore në ngarkim të tyre i kaluan prokurorisë së Fierit për veprime të mëtejshme hetimore për veprat penale “Prodhimi dhe shitja e narkotikëve”, “Prodhimi, mbajtja, blerja apo shitja pa leje e armëve të ftohta” dhe “Prodhimi dhe mbajtja pa leje e armëve dhe municionit luftarak”.

“Specialistët për Hetimin e Narkotikëve të DVP Fier, në bashkëpunim me shërbimet e Forcës së Posaçme “Shqiponja”, me mbështetjen e inteligjencës informative, për një rast të shitjes së lëndës narkotike kanabis, në doza, kanë organizuar dhe finalizuar operacionin policor të koduar “Sheqi”, si rezultat i të cilit u vunë në pranga shtetasit M. B., 18 vjeç dhe S. Y., 17 vjeç, të dy banues në Fier”, thuhet në njoftimin e policisë.