Aktualitet | Lajmi i fundit

Metaliaj: Rrogat e pedagogëve nën nivelin e rajonit, SPAK-u të ndërhyjë më thellë

25 Shkurt 2025 | 20:36

Pedagogu i njohur Ramiz Metaliaj, i cili ka punuar për më shumë se 30 vite në Universitetin Bujqësor të Tiranës, ka folur pas lëshimit të 20 masave sigurie nga SPAK lidhur me akuzat për abuzime me tendera në këtë universitet.

Në një intervistë për emisionin “Now me Erla Mëhillin”, ai shprehu shqetësimin e tij për përfshirjen e universitetit në këtë valë arrestimesh, duke theksuar se ky institucion, i njohur për reputacionin e tij, ka vuajtur nga centralizimi i administratës dhe mungesa e autonomisë.

Metaliaj shprehu keqardhje që Universiteti Bujqësor u përfol negativisht dhe u bë objekt i operacionit të SPAK. Ai theksoi se, pavarësisht punës së palodhur për më shumë se tre dekada, rrogat e pedagogëve janë ende të ulëta krahasuar me rajonin. “Është vështirë të jetosh me rrogën e pedagogut, pavarësisht ngritjes së pagave në tetor të 2023-ës. Ato vazhdojnë të jenë më të voglat në rajon,” tha Metaliaj.

Sipas tij, shumë pedagogë janë detyruar të punojnë për sektorin privat apo me organizma ndërkombëtarë për të siguruar të ardhura shtesë, për shkak të kushteve të ulëta ekonomike në universitet. Ai gjithashtu shprehu nevojën për të ndarë administratën nga stafin akademik, duke kritikuar centralizimin që ka ndodhur në këtë institucion.

Metaliaj vlerësoi operacionin e SPAK si një ndërhyrje të domosdoshme, duke e krahasuar atë me një “bisturi operacioni”, që ka pastruar pjesë të pandershme të administratës. Ai theksoi se hetimi duhet të thellohet më tej, duke përfshirë dhe aspekte të tjera të administratës universitare dhe jo vetëm tenderat.

“Ne e kishim pritur që do ndodhte ky aksion i SPAK, sepse gjithçka aty është përqendruar në një dorë dhe gjithçka është centralizuar në rang universiteti,” tha Metaliaj. “Duhet të ndahen administrata dhe stafi akademik, që shpesh emërohen nga ministria dhe partitë politike.”

LEXONI GJITHASHTU: