Milani “i vogël” përpara Interit, kualifikimi vendoset në Giuseppe Meazza

Interi ka mposhtur Milanin në San Siro mbrëmjen e së mërkurës, ndërsa ka hedhur një hap të madh drejt finales së Stambollit. Zikaltrit zhvilluan një ndeshje të mirë ndaj rivalëve të përjetshëm të qytetit, duke e zgjidhur që në minutat e para. Mungesa e sulmuesit Leao vështirësoi punën e Piolit dhe të besuarve të tij, duke mos patur një lojtar nga ku të ngrihej manovra sulmuese.

Zikaltrit edhe pse në transfertë dhe përpara 75 mijë të pranishmëve, ku pjesa më e madhe kuqezi, nuk e patën të vështirë të gjenin golin. Një mbulim jo i mirë i Kalabrias i dha mundësinë Dzekos të dërgonte në rrjetë një top të  ardhur nga goditja e këndit. 3 minuta më pas, në të 11ën, ishin sërish zikaltrit që përfituan nga një përgjumje e mbrojtjes së Milanit, me Mkhitaryan që u ballafaqua me Maignan, duke i shënuar këtij të fundit dhe golin e dytë.

Euforia e zikaltërve nuk do të zgjaste shumë, me kuqezinjtë që nisën disa herë manovrën sulmuese, por pa shumë kualitet për të kaluar Onanën. Junior Messias shpërdoroi disa mundësi të mira për të shënuar, ndërsa kualifikimi tanimë do të vendoset në ndeshjen e kthimit, që luhet në Meazza.

Kjo ishte fitorja e parë e Interit ndaj Milanit në një ndeshje të Uefa Champions League.

LEXONI GJITHASHTU:

• Man City nuk e realizon dot ‘hakmarrjen’ ndaj Realit, Haaland totalisht në hije
• “Udhëtimi që i kushtoi rëndë”- PSG pezullon Messin