Milaqi: Politika, e painteresuar që diaspora shqiptare të votojë

Sekretari i Përgjithshëm i Diasporës për Shqipërinë e Lirë, Bledar Milaqi thotë se politika është e painteresuar që shqiptarë të cilët jetojnë jashtë vendit, të mund të votojnë.

Në një intervistë për Euronews Albania, Milaqi u shpreh se deri më tani ka vetëm deklarata dhe jo gjëra konkrete.

“Mbetemi ende në fazat e deklaratave, i gjithë ky stumbullar rreth çështjes së votës së diasporës, fatkeqësisht, përsa i përket partive politike, është thjesht në fazën e deklaratave, nuk kemi hapa konkrete. Nëse i referohemi aktit të parë nënligjor që KQZ-ja ka draftuar për mënyrën e regjistrimit të shqiptarëve me vendbanim jashtë Shqipërisë, ky akt nënligjor i ka kaluar partive politike për komentim dhe ende partitë politike sot, që nga vera e këtij viti, nuk kanë dhënë ende mendimin e tyre ose cili është shqetësimi i tyre”,  theksoi ai.

Në zgjedhjet e 25 prillit, shqiptarëve që jetojnë jashtë vendit iu është cenuar e drejta kushtetuese e votës.

Ky është vendimi që ka shpallur Gjykata Kushtetuese pas padisë që ngriti organizata “Diaspora për Shqipërinë e Lirë”, e cila ankimonte vendimin e Ministrisë së Shëndetësisë, që më datë 19 prill 2021, pak ditë para zgjedhjeve të përgjithshme, vendosi karantinimin e të gjithë personave që vinin nga Maqedonia e Veriut dhe Greqia, duke iu pamundësuar kështu ardhjen në Shqipëri.

Për të shmangur përsëritjen e një vendimi të tillë, Gjykata detyron Kuvendin që të bëjë ndryshimet e nevojshme në legjislacion në mënyrë që t’u mundësohet e drejta e votës shqiptarë ve që jetojnë dhe punojnë jashtë vendit.

LEXONI GJITHASHTU

• Vota e emigrantëve, Kushtetuesja ultimatum Kuvendit: Brenda vitit të ndryshojë ligji
• ‘Majko t’i kërkojë falje Diasporës’, Logu: S’e ka kuptuar vendimin e Kushtetueses
• ‘Të tretët në botë për diasporën’, Forbes: 30.7% e shqiptarëve jetojnë jashtë vendit