Tragjedia në Himarë, Kumbaro: Policia të jetë në lartësinë që i imponon uniforma

Ministrja e Turizmit Mirela Kumbaro ka reaguar pas ngjarjes së rëndë të ndodhur 2 ditë më parë në Himarë, ku humbi jetën një 7-vjeçare pasi u përplas nga një gomone që drejtohej nga ish-efektivi Arjan Tase.

Me anë të një postimi në Twitter, Ministrja kërkon nga policia e shtetit të jetë në lartësinë e detyrës dhe dënim maksimal për autorin e ngjarjes së rëndë.

“Tejet e rëndë dhimbja për ngjarjen e kobshme në bregdetin e Himarës, ku një engjëll nuk është më mes nesh për shkak të marrëzisë së një njeriu që theu çdo ligj, çdo rregull e çdo normë me pasoja tragjikisht të pakthyeshme! Me vetëdijen se nuk ka fjalë të shërbejë sado pak si ngushëllim për prindërit, familjen për gjëmën që pësuan, kërkesa shkon për Drejtësinë që të bëjë punën e saj, pa asnjë kompromis, me dënim maksimal ndaj kujtdo që thyen ligjet e përbashkëta dhe rregullat dhe rrezikon të shkaktojë”, – shprehet Ministrja Kumbaro.

Ngjarja e rëndë ndodhi pas mesditës së të martës në plazhin e Potamit ku një fëmijë e mitur u përplas për vdekje teksa ishte në breg, nga një skaf që drejtohej nga shtetasi Arjan Tase.

Arjan Tase, ish-shef i komisariatit të Himarës është arrestuar dhe akuzohet për vrasje nga pakujdesia.

Në dëshminë e tij, Tase ka sqaruar se gomonia të cilën e ngiste ka marrë gaz në mënyrë të menjëhershme dhe ka bërë një rrotullim në vend e për pasojë ai ka humbur kontrollin.

Në këtë moment ka goditur vajzën 7-vjeçare e cila ka humbur jetën menjëherë.

LEXONI GJITHASHTU:

• Dëshmitë nga tragjedia në Himarë | 5 zhvillime kryesore
• Tragjedia në Himarë, Meçollari: Strukturat s’kanë motivim për zbatimin e ligjit