Një punonjës i kabinës dhe disa pasagjerë të mbijetuar nga rrëzimi i aeroplanit të Azerbajxhan Airlines kanë ndarë detaje tronditëse mbi momentet që paraprinë tragjedinë, duke përfshirë shpërthimet dhe problemet teknike në bord.
Zulfugar Asadov, stjuard në aeroplanin fatkeq, tha se avioni fillimisht kishte kërkuar leje për të kryer një ulje emergjente në Grozny, Çeçeni, por kërkesa u refuzua.
“Kapiteni vendosi të rrotullonte avionin dhe të kërkonte një destinacion alternativ. Ai u këshillua të bënte një ulje në det, por zgjodhi një kurs drejt Aktaut për ta ulur në tokë,” tha Asadov.
Punonjësi i avionit përshkroi momentin kur dëgjoi tre shpërthime, që mendohet se erdhën nga krahu i majtë i avionit.
“Kapiteni paralajmëroi se ulja do të ishte e vështirë dhe na kërkoi të përgatisnim pasagjerët. Më pas dëgjova një zhurmë të fortë dhe presioni në kabinë filloi të binte,” shtoi ai.
Një tjetër pasagjere, Vafa Shabanova, konfirmoi se kishte dëgjuar dy goditje të forta përpara se kabina të përjetonte probleme me oksigjenin. “Isha shumë e frikësuar,” tha ajo, duke kujtuar se një stjuardesë i kishte kërkuar të zhvendosej në pjesën e pasme të avionit për arsye sigurie.
Subhonkul Rakhimov, një tjetër pasagjer i mbijetuar, raportoi se kishte dëgjuar një zhurmë të fuqishme pak para rrëzimit të avionit. Dëshmitë e mbijetuarve tregojnë për një situatë kaotike dhe të mbushur me panik brenda kabinës, ndërsa ekuipazhi punonte për të qetësuar pasagjerët dhe për të mbajtur nën kontroll situatën.
Pavarësisht rrethanave të jashtëzakonshme, pilotët e avionit kanë marrë vlerësime për vendosmërinë e tyre për të ulur avionin në një destinacion të sigurt dhe për të shpëtuar sa më shumë jetë. Fatkeqësisht, të dy pilotët humbën jetën gjatë përplasjes.
LEXONI GJITHASHTU:
- “Avioni në Kazakistan u qëllua me raketë”- Rusia reagon ndaj hipotezave të hedhura
- “Pasagjeri i lutet Zotit”, dalin pamjet brenda avionit pak momente para rrëzimit
- Video dramatike/ Iu lut Zotit kur avioni ishte në ajër, e falenderon nga toka
