Monumentet e kulturës në Gjirokastër, 300 mijë turistë vizituan 500 objekte kulti

Përgjatë stinës së dimrit në Gjirokastër është ndërhyrë për mirëmbajtjen e monumenteve të kulturës në shërbim të zhvillimit të turizmit.

Qyteti i gurtë pasuri e UNESCO-s numëron rreth 500 objekte monumente kulture të kategorisë së parë dhe të dytë. Punimet e kryera janë përqendruar  në mirëmbajtjen e pikave më të vizituara nga turistët siç janë kalatë mesjetare.

“Në kuadër të planit vjetor 2023 Drejtoria Rajonale e Trashëgimisë Kulturore Gjirokastër ka kryer disa ndërhyrje në monumentet e kulturës së Kategorisë së Parë dhe të Dytë, kryesisht i është kushtuar rëndësi e veçantë pastrimit nga bimësia të këtyre objekteve siç janë kalaja e Gjirokastrës, kalaja e Libohovës, Kardhiqit, kalaja e Palokastrës, nga ana e Drejtorisë Rajonale të Trashgimisë Kulturore Gjirokastër është bërë një punë e madhe për ti pastruar këto objekte dhe mirëmbajtur, dua të theksoj se në kalanë e Gjirokastrës, sivjet pas një periudhe të gjatë kohe është kryer pastrimi i bimësisë në mure ku prerja e kësaj bimësie i ka rritur jetëgjatësinë mureve pasi rrezikonin dëmtimin e tyre”, thotë Ardis Duka, drejtor i Drejtorisë Rajonale të Trashëgimisë Kulturore.

Rëndësi i është kushtuar edhe mirëmbajtjes së monumenteve të objekteve të kultit, të cilat po tërheqin gjithmonë e më shumë vizitorë vendas dhe të huaj.

“Gjithashtu, gjatë këtij viti janë kryer edhe punime në disa objekte kulti si në kishën e Shën Kollit në Saraqinishtë, në manastirin e Mingulit, manastirin e Spilesë dhe në disa objekte të tjera si në Teqenë e Koshtanit disa riparime të çatisë”, tregon Duka.

Tashmë monumentet e kulturës në rajonin e Gjirokastrës janë kthyer në qendra të rëndësishme për zhvillimin e turizmit ndërsa përgjatë vitit 2023 u vizituan nga mbi 300 mijë turistë.

LEXONI GJITHASHTU:

• Aksidentoi me makinë një 12-vjeçare, procedohet i lirë i riu në Gjirokastër
• Masa për festat në Gjirokastër, Policia në gatishmëri për parandalimin e aksidenteve