Musliu: Rrugët që të çojnë në Jarinjë dhe Bërnjak ende të bllokuara nga serbët

Gazetari Jeton Musliu thotë se rrugët që të çojnë në Jarinjë dhe Bërnjak, në veri të Kosovës janë ende të bllokuara nga serbët.

Në një intervistë për Euronews Albania, Musliu u shpreh se situata është e qetë, por mbetet e tensionuar në veri të vendit.

“Vërehet një tensionim paksa më i përgjithshëm. Në veri të vendit vijojnë të mbeten të bllokuara dy rrugët kryesore që të çojnë në dy pikat kufitare në veri të republikës, pra ato që të çojnë në Jarinjë dhe Bërnjak.

Serbët lokalë kanë vazhduar t’i mbajnë të bllokuara këto dy akse rrugore, duke vendosur kamionë në mes të rrugës, në mënyrë që qarkullimi të ndërpritet. Në përgjithësi, situata është e qetë, por mbetet e tensionuar në veri të vendit”, theksoi ai.

Kryeministri i Kosovës, Albin Kurti ka reaguar pas deklaratës së Presidentit të Serbisë, Aleksandar Vuçiç, i cila tha se do t’i bëjë kërkesë KFOR-it, për dërgimin e pjesëtarëve të ushtrisë dhe policisë serbe në Kosovë.

Përmes një postimi në rrjetet sociale, Kurti theksoi se Kosova nuk kërkon konflikt, por do të mbrohet me forcë dhe vendosmëri.

Deklaratën e Vuçiçit, Kurti e ka cilësuar kërcënim me agresion ushtarak.

LEXONI GJITHASHTU

• ‘Kosova do të mbrohet me forcë dhe vendosmëri’, Kurti i përgjigjet Vuçiçit
• Sulmohet patrulla e EULEX-it në veri të Kosovës
• Serbët u detyruan që t’i vendosnin barrikadat në veri, thotë Vuçiç