Muxhahedinët kanë hakeruar agjenci shtetërore iraniane, thotë gazetari

Gazetari Olsi Jazexhi thotë se muxhahedinët të cilët strehohen në vendin tonë, kanë hakeruar agjenci kombëtare iraniane, para se Irani të kryente sulmin kibernetik më 15 korrik.

Në emisionin “Sot” në “Euronews Albania”, Jazexhi u shpreh se pas sulmit kibernetik ndaj Shqipërisë, ka kërkuar përmes një letre, që Këshilli i Sigurisë Kombëtare të hetojë aktivitetin e muxhahedinëve.

“Kur ka ndodhur hakerimi, i dërguam një letër presidentit, kryeministrit dhe Këshillit të Sigurisë Kombëtare, kur kërkuam që Këshilli i Sigurisë Kombëtare në Shqipëri të hetojë aktivitetin muxhahedin. Përpara se të ndodhte hakerimi ndaj Shqipërisë, muxhahedinët kanë hakeruar agjenci shtetërore iraniane. Diçka që është kriminale në Shqipëri dhe e dënueshme në Kodin Penal”, theksoi ai.

Kompania multinacionale Microsoft ka bërë publik një hetim që konfirmon se Irani qëndron prapa sulmit kibernetik kundër qeverisë shqiptare.

Menjëherë pas sulmit kibernetik kundër qeverisë shqiptare në mes të korrikut, Ekipi i Zbulimit dhe Reagimit të Microsoft (DART) u angazhua nga qeveria shqiptare për të drejtuar një hetim mbi sulmet – të cilat tashmë janë konfirmuar të jenë drejtuar nga shteti i Iranit.

Ndërsa, kryeministri Edi Rama kërkoi që stafi diplomatik i ambasadës së Republikës Islamike të Iranit të largohet brenda 24 orëve nga Shqipëria.

Në lidhje me sulmin kibernetik, këtë të premte, Departamenti i Thesarit të SHBA-së vendosi sanksione ndaj Ministrisë iraniane të Inteligjencës dhe Ministrin për Aktivitetet Malinje Kibernetike, Esmail Khatib.

LEXONI GJITHASHTU

• SHBA sanksionon Iranin për sulmin kibernetik ndaj Shqipërisë

• Microsoft publikon hetimin që konfirmon se Irani sulmoi Shqipërinë

• NATO dënon sulmin e Iranit ndaj Shqipërisë